ന്യൂഡൽഹി: പശ്ചിമ ബംഗാളിൽ ബുധനാഴ്ച നടക്കുന്ന അവസാനഘട്ട തെരഞ്ഞെടുപ്പിനുള്ള പരസ്യപ്രചാരണം ഇന്ന് അവസാനിക്കും. 142 മണ്ഡലങ്ങളിലേക്കാണ് ഈ ഘട്ടത്തിൽ വോട്ടെടുപ്പ് നടക്കുന്നത്. തൃണമൂൽ കോൺഗ്രസിന്റെ ശക്തികേന്ദ്രങ്ങളായ മണ്ഡലങ്ങളിലാണ് ഇത്തവണ പ്രധാനമായും വോട്ടെടുപ്പ് നടക്കുന്നത്. എന്നാൽ വോട്ടർ പട്ടിക പരിഷ്കരണത്തിന്റെ നേട്ടം ലഭിക്കുമെന്ന് ബിജെപി പ്രതീക്ഷിക്കുന്നു.
കഴിഞ്ഞ ദിവസങ്ങളിലുണ്ടായ അക്രമസംഭവങ്ങളുടെ പശ്ചാത്തലത്തിൽ തെരഞ്ഞെടുപ്പ് നടക്കുന്ന പ്രദേശങ്ങളിൽ സുരക്ഷ ശക്തമാക്കിയിട്ടുണ്ട്. പരിശോധനകൾക്കിടെ നിരവധി സ്ഥലങ്ങളിൽ നിന്ന് നാടൻ ബോംബുകൾ കണ്ടെത്തിയതായി പൊലീസ് അറിയിച്ചു.
സൗത്ത് 24 പർഗാനാസ് ജില്ലയിൽ ഒരു വീട്ടിൽ നിന്ന് 79 ബോംബുകൾ പിടിച്ചെടുത്തു. പൊലീസ്, കേന്ദ്രസേന എന്നിവ ചേർന്നാണ് പരിശോധന നടത്തിയത്. ബോംബ് കേസുകൾ എല്ലാം ദേശീയ അന്വേഷണ ഏജൻസിക്ക് കൈമാറാൻ ഇന്ത്യൻ തിരഞ്ഞെടുപ്പ് കമ്മീഷൻ നിർദ്ദേശം നൽകിയിട്ടുണ്ട്. ഇതിനിടെ, പ്രധാനമന്ത്രി നരേന്ദ്ര മോദിയുടെ കൊൽക്കത്ത റോഡ് ഷോയിൽ സ്ത്രീകളുടെ വലിയ പങ്കാളിത്തമുണ്ടായിരുന്നുവെന്ന് ബിജെപി അറിയിച്ചു.
