തിരുവനന്തപുരം:കേരളത്തിലെ അടുത്ത മുഖ്യമന്ത്രി ആരെന്ന കാര്യത്തിൽ നിർണ്ണായകമായ ഔദ്യോഗിക പ്രഖ്യാപനം ഉടനുണ്ടാകാൻ സാധ്യത. ഹൈക്കമാൻഡ് പ്രതിനിധി ദീപാ ദാസ് മുൻഷി ഇന്ന് വൈകിട്ട് മൂന്ന് മണിയോടെ തിരുവനന്തപുരത്ത് എത്തും. പ്രഖ്യാപനത്തിന് മുന്നോടിയായി കേരളത്തിലെ മുതിർന്ന നേതാക്കളുമായി അവർ ചർച്ച നടത്തും. അതേസമയം, മുഖ്യമന്ത്രി പദത്തെ ചൊല്ലിയുള്ള തർക്കങ്ങൾ മുറുകുന്നതിനിടെ രാഷ്ട്രീയ കേന്ദ്രങ്ങളിൽ തിരക്കിട്ട നീക്കങ്ങളാണ് നടക്കുന്നത്. എഐസിസി സംഘടനാ സെക്രട്ടറി കെ.സി. വേണുഗോപാലിനും പ്രതിപക്ഷ നേതാവ് വി.ഡി. സതീശനുമിടയിലാണ് പ്രധാനമായും മത്സരമെങ്കിലും നിലവിൽ കെ.സി. വേണുഗോപാലിനാണ് കൂടുതൽ മുൻതൂക്കം കൽപ്പിക്കപ്പെടുന്നത്.
മുഖ്യമന്ത്രി ചർച്ചകൾ സജീവമായിരിക്കെ എംഎൽഎമാരായ അബ്ദുൽ ഗഫൂർ, മുഹമ്മദ് ഷിയാസ് എന്നിവർ വി.ഡി. സതീശന്റെ ആലുവ ദേശത്തെ വീട്ടിലെത്തി കൂടിക്കാഴ്ച നടത്തിയത് രാഷ്ട്രീയ ശ്രദ്ധയാകർഷിച്ചിട്ടുണ്ട്. പ്രിയങ്ക ഗാന്ധിക്ക് വി.ഡി. സതീശനോട് അനുഭാവപൂർണ്ണമായ സമീപനമാണുള്ളതെങ്കിലും പാർട്ടിയിലെ ഭൂരിഭാഗം മുതിർന്ന നേതാക്കളും കെ.സി. വേണുഗോപാലിനെ പിന്തുണയ്ക്കുന്ന നിലപാടാണ് സ്വീകരിച്ചിരിക്കുന്നത്. എം.എം. ഹസൻ, മുല്ലപ്പള്ളി രാമചന്ദ്രൻ, കെ. സുധാകരൻ എന്നിവർക്ക് പുറമെ വർക്കിങ് പ്രസിഡന്റുമാരായ ഷാഫി പറമ്പിൽ, പി.സി. വിഷ്ണുനാഥ്, എ.പി. അനിൽകുമാർ എന്നിവരും തിരുവഞ്ചൂർ രാധാകൃഷ്ണനും വേണുഗോപാലിനൊപ്പമാണ്. എന്നാൽ വി.എം. സുധീരൻ, കെ. മുരളീധരൻ എന്നിവർ സതീശനെ പിന്തുണയ്ക്കുന്നു.
തീരുമാനം വൈകിപ്പിക്കുന്നതിൽ അതൃപ്തിയുള്ള മുല്ലപ്പള്ളി രാമചന്ദ്രൻ ഡൽഹി ചർച്ചകളിൽ നിന്ന് വിട്ടുനിന്നിരുന്നു. വേണുഗോപാലിനെ പിന്തുണയ്ക്കുന്ന വർക്കിങ് പ്രസിഡന്റുമാരെ പ്രത്യേകമായി ഡൽഹിയിലേക്ക് വിളിപ്പിച്ച ഹൈക്കമാൻഡ് നടപടിയിൽ സതീശൻ ക്യാമ്പിന് കടുത്ത അതൃപ്തിയുണ്ട്. ദീപാ ദാസ് മുൻഷിയുടെ സന്ദർശനത്തോടെ അനിശ്ചിതത്വങ്ങൾക്ക് വിരാമമാകുമെന്നാണ് അണികൾ പ്രതീക്ഷിക്കുന്നത്.
