ടെഹ്റാൻ: അമേരിക്കയുമായുള്ള മാസങ്ങളായി തുടരുന്ന സൈനിക സംഘർഷത്തിനിടെ നിലപാട് കൂടുതൽ കടുപ്പിച്ച് ഇറാൻ. അമേരിക്ക യുദ്ധവും ഉപരോധവും അവസാനിപ്പിക്കുകയും മേഖലയിൽ വെടിനിർത്തൽ ഉറപ്പാക്കുകയും ചെയ്യുന്നതുവരെ ഹോർമുസ് കടലിടുക്ക് തുറക്കില്ലെന്ന് ഇറാൻ വ്യക്തമാക്കി. ഇറാന്റെ പുതിയ സുപ്രീം നാഷണൽ സെക്യൂരിറ്റി കൗൺസിൽ സെക്രട്ടറി മൊഹ്സെൻ റെസായിയാണ് നിലപാട് വ്യക്തമാക്കിയത്.
ഇറാന്റെ മരവിപ്പിച്ച ആസ്തികൾ വിട്ടുനൽകുക, അമേരിക്കയുടെ സൈനിക നടപടികൾ അവസാനിപ്പിക്കുക, ഗാസയിലും ലെബനനിലുമടക്കം മേഖലയിലെ സംഘർഷങ്ങൾക്ക് വിരാമമിടുക എന്നിവയാണ് ഇറാൻ മുന്നോട്ടുവച്ച പ്രധാന നിബന്ധനകൾ. ഈ ആവശ്യങ്ങൾ അംഗീകരിക്കുന്നതുവരെ ഹോർമുസ് അടഞ്ഞുതന്നെ തുടരുമെന്നാണ് റെസായി വ്യക്തമാക്കിയത്.
സുപ്രീം നാഷണൽ സെക്യൂരിറ്റി കൗൺസിൽ സെക്രട്ടറിയായ ശേഷമുള്ള ആദ്യ കൂടിക്കാഴ്ചയിൽ റെസായി ടെഹ്റാനിലെ ചൈനീസ് അംബാസഡർ സോങ് പിയുവുമായി ചർച്ച നടത്തി. ഐക്യരാഷ്ട്രസഭയിൽ ഇറാനെതിരായ അമേരിക്കൻ പിന്തുണയുള്ള പ്രമേയങ്ങളെ എതിർത്ത ചൈനയുടെ നിലപാടിനെ അദ്ദേഹം പ്രശംസിച്ചു. ഹോർമുസ് സംബന്ധിച്ച് ഒമാനുമായി ഉണ്ടാകുന്ന ഏത് ധാരണയും അമേരിക്കയിൽനിന്ന് സ്വതന്ത്രമായിരിക്കണമെന്നും റെസായി വ്യക്തമാക്കി.
അതേസമയം, ഹോർമുസ് പ്രതിസന്ധി പരിഹരിക്കുന്നതിനുള്ള നയതന്ത്ര ശ്രമങ്ങൾ തുടരുകയാണ്. ഒമാനുമായി പുതിയ കപ്പൽപ്പാത സംബന്ധിച്ച ധാരണയിലേക്ക് ഇറാൻ അടുക്കുകയായിരുന്നെങ്കിലും അമേരിക്കയുടെ ആവശ്യങ്ങളും ഇറാന്റെ നിബന്ധനകളും തമ്മിലുള്ള ഭിന്നതകൾ നിലനിൽക്കുകയാണ്.
ഇറാന്റെ നിലപാട് കടുപ്പിച്ചതോടെ മേഖലയിലെ സമുദ്രഗതാഗതത്തിലും ആശങ്ക വർധിച്ചിട്ടുണ്ട്. ലോകത്തിലെ പ്രധാന എണ്ണ ഗതാഗതപാതകളിലൊന്നായ ഹോർമുസ് കടലിടുക്കിലെ നിയന്ത്രണങ്ങൾ ആഗോള ഊർജവിപണിയെയും ബാധിക്കുന്ന സാഹചര്യമാണ് നിലവിലുള്ളത്.
അതേസമയം, അമേരിക്കൻ ആക്രമണമുണ്ടായാൽ ശക്തമായ തിരിച്ചടി നൽകുമെന്ന മുന്നറിയിപ്പുമായി ഇറാൻ സുരക്ഷാ വിഭാഗങ്ങളും രംഗത്തെത്തിയിട്ടുണ്ട്. രാജ്യത്തിന്റെ ഊർജ സംവിധാനങ്ങളെയോ മറ്റ് അടിസ്ഥാന സൗകര്യങ്ങളെയോ ലക്ഷ്യമിട്ടാൽ തിരിച്ചടിക്കുമെന്നാണ് മുന്നറിയിപ്പ്.
ഇതിനിടെ ഇറാൻ സൈനിക, സുരക്ഷാ സംവിധാനങ്ങളിൽ പുനഃസംഘടനയും ശക്തമാക്കുകയാണ്. പുതിയ സൈനിക നിയമനങ്ങളിലൂടെ റെഗുലർ സൈന്യവും ഐആർജിസിയും തമ്മിലുള്ള ഏകോപനം വർധിപ്പിക്കാനുള്ള നീക്കങ്ങളും നടക്കുന്നു.
യുദ്ധഭീതിക്കും സാമ്പത്തിക പ്രതിസന്ധിക്കും ഇടയിൽ സാധാരണ ജനജീവിതവും ദുരിതത്തിലാണെന്നാണ് റിപ്പോർട്ടുകൾ. അമേരിക്കയുമായുള്ള സംഘർഷം അവസാനിപ്പിക്കുന്നതിനുള്ള നയതന്ത്ര ശ്രമങ്ങൾ തുടരുമ്പോഴും ഹോർമുസ് കടലിടുക്ക് തുറക്കുന്നതുമായി ബന്ധപ്പെട്ട് ഇറാൻ കൂടുതൽ കർശനമായ നിബന്ധനകൾ മുന്നോട്ടുവയ്ക്കുകയാണ്.
