ന്യൂഡൽഹി: കേന്ദ്ര സർക്കാർ മന്ത്രാലയങ്ങൾ, പൊതുമേഖലാ സ്ഥാപനങ്ങൾ, ബാങ്കുകൾ, റെയിൽവേ, ടെലികോം തുടങ്ങിയ മേഖലകളുമായി ബന്ധപ്പെട്ട പരാതികൾ പരിഹരിക്കുന്നതിന് ഇനി ഓഫീസുകൾ കയറിയിറങ്ങി അലയേണ്ടതില്ല. പരാതികൾക്ക് കൃത്യമായ മറുപടിയും വേഗത്തിലുള്ള പരിഹാരവും ഉറപ്പാക്കാൻ സജ്ജമാക്കിയിട്ടുള്ള കേന്ദ്ര ഗവൺമെന്റിന്റെ ഔദ്യോഗിക സംവിധാനമാണ് പബ്ലിക് ഗ്രീവൻസ് പോർട്ടൽ (PG Portal). ഉദ്യോഗസ്ഥരുടെ ഭാഗത്തുനിന്നുണ്ടാകുന്ന വീഴ്ചകളും സേവനങ്ങളിലെ അനാവശ്യമായ കാലതാമസവും ഈ പോർട്ടൽ വഴി നേരിട്ട് അധികൃതരെ അറിയിക്കാം. കേന്ദ്ര ഗവൺമെന്റ് വകുപ്പുകൾക്കെതിരെയുള്ള പരാതികൾ സമയബന്ധിതമായും സുതാര്യമായും പരിഹരിക്കപ്പെടുന്നു എന്ന് ഉറപ്പാക്കുന്ന ഈ പ്ലാറ്റ്ഫോം വഴി അപേക്ഷകർക്ക് നേരിട്ട് ഓഫീസുകളിൽ എത്താതെ തന്നെ ഓൺലൈനായി പരാതി ഫയൽ ചെയ്യാനും അതിന്റെ പുരോഗതി കൃത്യസമയത്ത് പരിശോധിക്കാനും സാധിക്കും.
പിജി പോർട്ടലിൽ പരാതി നൽകിയാൽ മിക്ക വകുപ്പുകളും 30 ദിവസത്തിനുള്ളിൽ മറുപടി നൽകാൻ ബാധ്യസ്ഥരാണ് എന്നതാണ് ഇതിന്റെ പ്രധാന പ്രത്യേകത. പരാതിയുടെ നിലവിലെ അവസ്ഥ ഓൺലൈനായി എപ്പോൾ വേണമെങ്കിലും പരിശോധിക്കാമെന്നതിനൊപ്പം പരാതിക്കൊപ്പം ആവശ്യമായ അനുബന്ധ രേഖകൾ അപ്ലോഡ് ചെയ്യാനുള്ള സൗകര്യവും പോർട്ടലിലുണ്ട്. ലഭിച്ച മറുപടി തൃപ്തികരമല്ലെങ്കിൽ പോർട്ടൽ വഴി തന്നെ ഉന്നത ഉദ്യോഗസ്ഥർക്ക് അപ്പീൽ നൽകാനും പൊതുജനങ്ങൾക്ക് സാധിക്കും. സാധാരണക്കാർക്ക് കേന്ദ്ര സർക്കാർ സേവനങ്ങളിൽ നേരിടുന്ന തടസ്സങ്ങൾ ഒഴിവാക്കാനും സുതാര്യത ഉറപ്പുവരുത്താനും ഈ സംവിധാനം ഏറെ സഹായകമാകും.
