തൃശൂർ: ദേശീയപാത 66-ൽ തൃശൂർ ജില്ലയിലെ ടോൾ പിരിവ് വ്യാഴാഴ്ച മുതൽ ആരംഭിക്കാനുള്ള നീക്കത്തിനെതിരെ സിപിഎം രംഗത്ത്. നിർമ്മാണ പ്രവർത്തനങ്ങൾ പൂർണമായി പൂർത്തിയാക്കാതെ ടോൾ പിരിവ് തുടങ്ങരുതെന്ന് സിപിഎം ആവശ്യപ്പെട്ടു. ടോൾ പിരിവ് ആരംഭിക്കാനുള്ള തീരുമാനത്തിൽ നിന്ന് ദേശീയപാത അതോറിറ്റി പിന്മാറണമെന്നും പാർട്ടി ആവശ്യപ്പെട്ടു.
ജില്ലയിലെ നാട്ടികയിലാണ് ടോൾ പ്ലാസ. ചാവക്കാട് (ഒരുമനയൂർ), ചേറ്റുവ, കണ്ടശ്ശാംകടവ് എന്നിവിടങ്ങളിലെ പാലങ്ങളുടെയും എടമുട്ടം, മൂന്നുപീടിക ഉൾപ്പെടെയുള്ള പ്രദേശങ്ങളിലെ അപ്രോച്ച് റോഡുകളുടെയും നിർമ്മാണം പൂർത്തിയായിട്ടില്ലെന്നാണ് സിപിഎം ആരോപണം.
കഴിഞ്ഞ നാല് മാസമായി ദേശീയപാതയുടെ നിർമ്മാണ പ്രവർത്തനങ്ങൾ മന്ദഗതിയിലാണെന്നും നിർമ്മാണ അവലോകനം നടക്കുന്നില്ലെന്നും സിപിഎം വാർത്താക്കുറിപ്പിൽ പറഞ്ഞു. കൊടുങ്ങല്ലൂർ മുതൽ തെക്കോട്ട് എറണാകുളം, ആലപ്പുഴ, കൊല്ലം ജില്ലകളിലും ദേശീയപാത നിർമ്മാണം മന്ദഗതിയിലാണെന്നാണ് പാർട്ടിയുടെ ആരോപണം.
നിർമ്മാണം പൂർത്തിയാക്കാതെ നാട്ടികയിൽ ടോൾ പിരിവ് ആരംഭിക്കുന്നത് ദേശീയപാത അതോറിറ്റിയുടെ മുൻ പ്രഖ്യാപനത്തിന് വിരുദ്ധമാണെന്നും സിപിഎം വ്യക്തമാക്കി. ടോൾ പിരിവിനെതിരെ നാളെ നാട്ടികയിലെ ടോൾ പ്ലാസയിലേക്ക് പ്രതിഷേധ മാർച്ച് നടത്തുമെന്നും പാർട്ടി അറിയിച്ചു.
