ന്യൂഡൽഹി: ഡൽഹിയിലെ ബട്ല ഹൗസ് പ്രദേശത്ത് ദളിത് യുവതിയെ തട്ടിക്കൊണ്ടുപോയി കൂട്ടബലാത്സംഗം ചെയ്തതായും മതംമാറ്റാൻ ശ്രമിച്ചതായും പരാതി. 23 വയസ്സുള്ള യുവതിയാണ് പോലീസിൽ പരാതി നൽകിയത്. സാമൂഹിക മാധ്യമത്തിലൂടെയാണ് സാഹിൽ എന്ന പേരിൽ പരിചയപ്പെട്ട യുവാവുമായി യുവതി ബന്ധത്തിലായത്.
പിന്നീട് ഇയാളുടെ യഥാർത്ഥ പേര് ഫഹീം ആണെന്ന് മനസ്സിലായതായി യുവതി പരാതിയിൽ പറഞ്ഞു. താൻ സമ്പന്ന ഹിന്ദു കുടുംബത്തിൽപ്പെട്ട ആളാണെന്നും വിവാഹം കഴിക്കാമെന്നും പറഞ്ഞ് ഇയാൾ വിശ്വാസം നേടിയതായും യുവതി ആരോപിച്ചു.
2022-ൽ ഫഹീം യുവതിയെ ബട്ല ഹൗസിലേക്ക് വിളിച്ചുവരുത്തി കൂട്ടബലാത്സംഗം ചെയ്തുവെന്നാണ് പരാതി. ഇയാളും സുഹൃത്തും ചേർന്ന് പീഡന ദൃശ്യങ്ങൾ വീഡിയോയിൽ പകർത്തി പിന്നീട് ഭീഷണിപ്പെടുത്തിയതായും യുവതി പറഞ്ഞു. തുടർന്ന് മീററ്റിലേക്ക് കൊണ്ടുപോയി വീണ്ടും ലൈംഗികമായി ഉപദ്രവിച്ചതായും പരാതിയിലുണ്ട്.
ഫഹീമും ബന്ധുക്കളും അനധികൃത ആയുധക്കച്ചവടത്തിൽ ഏർപ്പെട്ടിരുന്നുവെന്നും യുവതി ആരോപിച്ചു. ഭയപ്പെടുത്താൻ രക്തത്തിൽ മുക്കുകയും മാംസക്കഷണങ്ങൾ എറിയുകയും ചെയ്തതായും യുവതി മൊഴി നൽകി. തസ്ലീം മൗലവി എന്ന ആളും തന്നെ പീഡിപ്പിച്ചതായും യുവതി ആരോപിച്ചു. മതംമാറ്റാൻ ശ്രമങ്ങളും നടന്നതായും പരാതിയിൽ പറയുന്നു. സംഭവത്തിൽ സൗത്ത് ഈസ്റ്റ് ഡൽഹി പോലീസ് എഫ്.ഐ.ആർ രജിസ്റ്റർ ചെയ്തു. നാല് പ്രതികളെ അറസ്റ്റ് ചെയ്തതായും പോലീസ് അറിയിച്ചു. ആദ്യ സംഭവം ബട്ല ഹൗസ് പ്രദേശത്ത് നടന്നതിനാൽ ജാമിയ നഗർ പോലീസ് സ്റ്റേഷനിലാണ് കേസ് രജിസ്റ്റർ ചെയ്തിരിക്കുന്നത്.
2025-ൽ ഗുരുഗ്രാം പോലീസ് ഫഹീമിനെ അറസ്റ്റ് ചെയ്ത് യുവതിയുടെ ചിത്രങ്ങളും വീഡിയോകളും അടങ്ങിയ മൊബൈൽ ഫോൺ പിടിച്ചെടുത്തിരുന്നു. എന്നാൽ ജയിലിൽ നിന്നുമുതൽ ഫഹീം ഭീഷണിപ്പെടുത്തിയതായും ദുബായ് നമ്പറിൽ നിന്ന് ഫോൺ കോളുകൾ വന്നതായും യുവതി ആരോപിച്ചു.
സംഭവത്തിൽ പോലീസ് അന്വേഷണം തുടരുകയാണ്.
