കൊച്ചി: കൊട്ടാരക്കര നടുവത്തൂർ ഈശ്വരവിലാസം സ്കൂളിലെ പ്രധാനാധ്യാപിക സിന്ധു എസ്. നായർക്ക് ചുരിദാർ ധരിച്ചെത്തിയതിന്റെ പേരിൽ വിലക്കേർപ്പെടുത്തിയ സംഭവത്തിൽ ഹൈക്കോടതി ശക്തമായ ഇടപെടൽ നടത്തിയിരിക്കുകയാണ്. അധ്യാപികയ്ക്ക് ജോലിസ്ഥലത്ത് ആവശ്യമായ പോലീസ് സംരക്ഷണം നൽകണമെന്നും ഹർജിയിൽ അന്തിമ തീരുമാനം ഉണ്ടാകുന്നത് വരെ അവരുടെ ദൈനംദിന പ്രവർത്തനങ്ങളിൽ സ്കൂൾ മാനേജർ ഇടപെടരുതെന്നും കോടതി ഉത്തരവിട്ടു.
സ്കൂൾ മാനേജർക്കെതിരെ സ്വീകരിച്ച നടപടികളെക്കുറിച്ച് വിദ്യാഭ്യാസ വകുപ്പ് സെക്രട്ടറി കോടതിയെ ബോധ്യപ്പെടുത്തണമെന്നും നിർദ്ദേശമുണ്ട്.
ഫെബ്രുവരി നാലിനാണ് വിവാദമായ ഈ സംഭവം നടന്നത്. ചുരിദാർ ധരിച്ച് സ്കൂളിലെത്തിയ പ്രധാനാധ്യാപികയെ സെക്യൂരിറ്റി ജീവനക്കാരൻ ഗേറ്റിൽ തടയുകയായിരുന്നു. വസ്ത്രധാരണത്തിന്റെ പേരിൽ അധ്യാപികയെ മാറ്റിനിർത്തിയത് കെ.ഇ.ആർ ചട്ടങ്ങളുടെ ലംഘനമാണെന്ന് വിദ്യാഭ്യാസ വകുപ്പ് നേരത്തെ തന്നെ കണ്ടെത്തിയിരുന്നു. എന്നാൽ, സെക്യൂരിറ്റി ജീവനക്കാരൻ അധ്യാപികയെ തടഞ്ഞത് തന്റെ അറിവോടെയല്ലെന്നും നിലവിലെ പോലീസ് നടപടികൾ ഏകപക്ഷീയമാണെന്നുമാണ് സ്കൂൾ മാനേജർ സുരേഷിന്റെ വാദം. ഇതേത്തുടർന്ന് സെക്യൂരിറ്റി ജീവനക്കാരനെ ജോലിയിൽ നിന്ന് പിരിച്ചുവിടുകയും ചെയ്തിട്ടുണ്ട്.
അതേസമയം, തനിക്ക് സ്കൂളിൽ ജോലി ചെയ്യാൻ ഭയമാണെന്നും സ്വസ്ഥമായി ജോലി ചെയ്യാനുള്ള സാഹചര്യം ഒരുക്കണമെന്നും ആവശ്യപ്പെട്ട് സിന്ധു നായർ രംഗത്തെത്തി. തന്നോട് ചുരിദാർ ധരിച്ചു വരരുതെന്ന് മാനേജർ മുൻപും ആവശ്യപ്പെട്ടിട്ടുണ്ടെന്നും കേസ് ഒതുക്കിത്തീർക്കാൻ ശ്രമം നടക്കുന്നുണ്ടെന്നും അവർ ആരോപിക്കുന്നു. ഈ സാഹചര്യത്തിലാണ് അധ്യാപികയുടെ സുരക്ഷയും തൊഴിൽ സാഹചര്യവും ഉറപ്പുവരുത്തിക്കൊണ്ട് ഹൈക്കോടതിയുടെ ഈ സുപ്രധാന ഉത്തരവ് വന്നിരിക്കുന്നത്.
