കൊച്ചി: എറണാകുളം ചെറായി സ്വദേശിയായ യുവാവിനെ കപ്പലിൽ നിന്ന് കാണാതായതായി പരാതി. ഞാറയ്ക്കൽ സ്വദേശി ഷിന്റോൺ ബെന്നി (24)യെയാണ് കാണാതായത്. ദക്ഷിണാഫ്രിക്കയിൽ നിന്ന് സിംഗപ്പൂരിലേക്ക് പോയ കപ്പലിൽ നിന്നാണ് ഷിന്റോണിനെ കാണാതായത്. മുംബൈ ആസ്ഥാനമായ MOL കമ്പനിയിൽ ഡെക്ക് ഓഫീസർ ട്രെയിനിയായി ജോലി ചെയ്യുകയായിരുന്നു ഷിന്റോൺ. ടാർ കാരിയർ കപ്പലിലായിരുന്നു ജോലി.
ബുധനാഴ്ച രാത്രി 8.15ഓടെ ഷിന്റോൺ സഹോദരനെ ഫോണിൽ വിളിച്ച് സംസാരിച്ചിരുന്നു. അതിന് ശേഷം ഇന്നലെയാണ് ഷിന്റോണിനെ കാണാനില്ലെന്ന വിവരം കമ്പനി ബന്ധുക്കളെ അറിയിച്ചത്. ഷിന്റോണിനെ കണ്ടെത്താനുള്ള അന്വേഷണം തുടരുകയാണ്. സർക്കാർ തലത്തിൽ ഇടപെടൽ നടത്തി തിരച്ചിൽ ഊർജിതമാക്കണമെന്നാണ് ബന്ധുക്കളുടെ ആവശ്യം. നാളെ ഷിന്റോണിന്റെ പിറന്നാൾ കൂടിയാണ്.
