അരീക്കോട്: പത്തനാപുരം പൂവത്തിക്കണ്ടിയിൽ പുലർച്ചെയുണ്ടായ തീപിടുത്തത്തിൽ മൂന്ന് കാളകൾ ദാരുണമായി വെന്തുമരിച്ചു. പൂവത്തിക്കണ്ടി ഫസൽ റഹ്മാൻ എന്ന ബാപ്പുവിന്റെ ഉടമസ്ഥതയിലുള്ള തൊഴുത്തിനാണ് തീപിടിച്ചത്. കാളപൂട്ട് മത്സരങ്ങൾക്കായി ലക്ഷങ്ങൾ ചെലവഴിച്ച് പ്രത്യേകമായി വളർത്തിക്കൊണ്ടുവന്ന കാളകളാണ് അപകടത്തിൽപ്പെട്ടത്. തീപിടുത്തം ഉണ്ടായ ഉടൻ തന്നെ തൊഴുത്ത് പൂർണ്ണമായും അഗ്നിക്കിരയാകുകയും തീ അതിവേഗം പടർന്നതിനാൽ കാളകൾക്ക് പുറത്തുകടക്കാൻ കഴിയാത്ത സാഹചര്യം ഉണ്ടാവുകയുമായിരുന്നു.
തീ പടരുന്നത് ശ്രദ്ധയിൽപ്പെട്ട ഉടൻ തന്നെ നാട്ടുകാർ ഓടിയെത്തി രക്ഷാപ്രവർത്തനത്തിന് ശ്രമിച്ചെങ്കിലും തീ നിയന്ത്രണവിധേയമാക്കാൻ സാധിച്ചില്ല. തുടർന്ന് മാവൂരിൽ നിന്ന് അഗ്നിരക്ഷാ സേനയെ വിവരമറിയിക്കുകയായിരുന്നു. ഫയർഫോഴ്സ് സ്ഥലത്തെത്തി ദീർഘനേരം നടത്തിയ പരിശ്രമത്തിനൊടുവിലാണ് തീ പൂർണ്ണമായും അണയ്ക്കാനായത്. എന്നാൽ അപ്പോഴേക്കും കാളകൾ ദാരുണമായി മരണപ്പെട്ടിരുന്നു. ലക്ഷക്കണക്കിന് രൂപയുടെ നഷ്ടമാണ് ഈ അപകടത്തിലൂടെ ഉടമയ്ക്ക് സംഭവിച്ചിരിക്കുന്നത്.
തീപിടുത്തത്തിന്റെ കൃത്യമായ കാരണം ഇതുവരെ വ്യക്തമായിട്ടില്ല. ഷോർട്ട് സർക്യൂട്ടാണോ അതോ മറ്റെന്തെങ്കിലും അസ്വാഭാവിക കാരണങ്ങളാണോ അപകടത്തിന് പിന്നിലെന്ന് അധികൃതർ പരിശോധിച്ചുവരികയാണ്. സംഭവമറിഞ്ഞ് അരീക്കോട് പൊലീസ് സ്ഥലത്തെത്തി വിവരങ്ങൾ ശേഖരിച്ചു. അസിസ്റ്റന്റ് സ്റ്റേഷൻ ഓഫിസർ പ്രമോദ്. പി, സീനിയർ ഫയർ ആൻഡ് റെസ്ക്യൂ ഓഫിസർ ഹബീബ് റഹ്മാൻ, ഫയർ ആൻഡ് റെസ്ക്യൂ ഓഫിസർമാരായ എസ്.കെ.ടി. ജയേഷ്, മഹേഷ്. ടി.പി, സി. വിവേക്, മഹേഷ്. എം, ഫിജീഷ് എന്നിവരുടെ നേതൃത്വത്തിലാണ് അഗ്നിരക്ഷാ സേന രക്ഷാപ്രവർത്തനങ്ങൾ ഏകോപിപ്പിച്ചത്. പ്രിയപ്പെട്ട കാളകളുടെ വിയോഗം നാടിനെയാകെ ദുഃഖത്തിലാഴ്ത്തിയിരിക്കുകയാണ്.
