ദുബായ്: ദുബായിൽ നിന്ന് ഇസ്രയേലിലെ ടെൽ അവീവിലേക്ക് പുറപ്പെട്ട ഫ്ലൈ ദുബായ് വിമാനം സാങ്കേതിക കാരണങ്ങളെ തുടർന്ന് സൗദി അറേബ്യയിലെ തബൂക്ക് വിമാനത്താവളത്തിൽ അടിയന്തരമായി ഇറക്കി. ബുധനാഴ്ച യാത്രാമധ്യേ ഉണ്ടായ അപ്രതീക്ഷിത സംഭവത്തെ തുടർന്നാണ് വിമാനം തബൂക്കിൽ ലാൻഡ് ചെയ്തതെന്ന് ഫ്ലൈ ദുബായ് വക്താവ് ഔദ്യോഗിക പ്രസ്താവനയിലൂടെ സ്ഥിരീകരിച്ചു.
ദുബായ് അന്താരാഷ്ട്ര വിമാനത്താവളത്തിൽ നിന്ന് ബെൻ ഗുറിയൻ അന്താരാഷ്ട്ര വിമാനത്താവളത്തിലേക്ക് സർവീസ് നടത്തിയ എഫ് ഇസെഡ് 1073 വിമാനമാണ് തബൂക്ക് വിമാനത്താവളത്തിൽ സുരക്ഷിതമായി ഇറക്കിയത്. വിമാനത്തിലുണ്ടായിരുന്ന യാത്രക്കാരും ജീവനക്കാരും സുരക്ഷിതരാണെന്നും എല്ലാവരെയും കണ്ടെത്തിയതായും എയർലൈൻ അറിയിച്ചു.
എന്നാൽ വിമാനത്തിൽ ഉണ്ടായ അടിയന്തര സാഹചര്യം എന്താണെന്ന് ഫ്ലൈ ദുബായ് ഇതുവരെ വ്യക്തമാക്കിയിട്ടില്ല. യാത്രക്കാരുടെയും ജീവനക്കാരുടെയും സുരക്ഷയ്ക്കാണ് എപ്പോഴും മുൻഗണന നൽകുന്നതെന്ന് എയർലൈൻ വക്താവ് അറിയിച്ചു. സംഭവത്തിൽ പ്രാദേശിക, വ്യോമയാന അധികൃതരുമായി ചേർന്ന് പരിശോധന തുടരുകയാണെന്നും കൂടുതൽ വിവരങ്ങൾ സ്ഥിരീകരിക്കുന്ന മുറയ്ക്ക് പുറത്തുവിടുമെന്നും ഫ്ലൈ ദുബായ് വ്യക്തമാക്കി.
അതേസമയം, വിമാനം തട്ടിക്കൊണ്ടുപോകാൻ ശ്രമിക്കുന്നുവെന്ന് സൂചിപ്പിക്കുന്ന കോഡ് ഉൾപ്പെടെ രണ്ട് അടിയന്തര അപായ സൂചനകൾ വിമാനത്തിൽ നിന്ന് ലഭിച്ചതിനെ തുടർന്നാണ് വിമാനം വഴിതിരിച്ചുവിട്ടതെന്ന റിപ്പോർട്ടുകൾ നേരത്തെ പുറത്തുവന്നിരുന്നു. പൈലറ്റുമാർ തമ്മിൽ വിമാനത്തിനുള്ളിൽ രൂക്ഷമായ തർക്കമുണ്ടാകുകയും തുടർന്ന് ഒരാൾ മറ്റൊരാളെ ആക്രമിക്കുകയും ചെയ്തതായും വിമാനം ഹൈജാക്ക് ചെയ്തുവെന്ന തെറ്റായ സൂചന നൽകിയതായും ചില ഇസ്രയേലി മാധ്യമങ്ങൾ റിപ്പോർട്ട് ചെയ്തു. എന്നാൽ ഈ വിവരങ്ങൾ ഫ്ലൈ ദുബായ് ഔദ്യോഗികമായി സ്ഥിരീകരിച്ചിട്ടില്ല.
