തിരഞ്ഞെടുപ്പ് വാഗ്ദാനങ്ങൾ പാലിക്കപ്പെടുന്നത് ജനാധിപത്യത്തിൽ സ്വാഗതാർഹമായ കാര്യമാണെങ്കിലും, ഒരു വിഭാഗത്തിന് നൽകുന്ന ആനുകൂല്യങ്ങൾ മറുവിഭാഗത്തിന്റെ ജീവിതം നരകതുല്യമാക്കിക്കൊണ്ടാകരുത്. യു.ഡി.എഫ് തങ്ങളുടെ പ്രധാന തിരഞ്ഞെടുപ്പ് വാഗ്ദാനങ്ങളിലൊന്നായി മുന്നോട്ടുവെക്കുകയും, ഭരണത്തിലേറിയ ആദ്യ കാബിനറ്റിൽ തന്നെ ഉത്തരവാക്കുകയും ചെയ്ത ‘കെ.എസ്.ആർ.ടി.സി ബസുകളിൽ സ്ത്രീകൾക്ക് സൗജന്യയാത്ര’ എന്ന നയം സ്ത്രീകളെ സന്തോഷിപ്പിക്കുന്നുണ്ടാകാം. എന്നാൽ, ‘പുരുഷന്മാരും മനുഷ്യരാണ്’ എന്ന ലളിതമായ യാഥാർത്ഥ്യം ഭരണാധികാരികൾ മറന്നുപോയോ എന്ന ചോദ്യമാണ് കേരളത്തിലെ ലക്ഷക്കണക്കിന് വരുന്ന സാധാരണക്കാരായ പുരുഷന്മാർ ഇപ്പോൾ ഉയർത്തുന്നത്. സ്ത്രീശാക്തീകരണത്തിന്റെ പേരുപറഞ്ഞ് സമൂഹത്തിലെ പകുതിയോളം വരുന്ന പുരുഷന്മാരുടെ സാമ്പത്തിക പ്രതിസന്ധികളെയും ജീവിത യാഥാർത്ഥ്യങ്ങളെയും പൂർണ്ണമായി തള്ളിക്കളയുന്ന ഈ നയം ജനാധിപത്യ മൂല്യങ്ങൾക്കും ഭരണഘടന ഉറപ്പുനൽകുന്ന തുല്യതയ്ക്കും നിരക്കാത്തതാണ്.

സാമ്പത്തിക പ്രതിസന്ധിയും ദാരിദ്ര്യവും ലിംഗാടിസ്ഥാനത്തിലല്ല സമൂഹത്തിൽ നിലനിൽക്കുന്നത്. കേരളത്തിലെ ഭൂരിഭാഗം സാധാരണ കുടുംബങ്ങളുടെയും ഏക വരുമാന മാർഗ്ഗം ലോട്ടറി വിൽപ്പനക്കാർ, ദിനകൂലിക്കാർ, നിർമ്മാണ തൊഴിലാളികൾ, കടകളിലെ ജീവനക്കാർ, സെക്യൂരിറ്റി ജീവനക്കാർ തുടങ്ങിയ പുരുഷന്മാരാണ്. ചുട്ടുപൊള്ളുന്ന വെയിലിലും പ്രതികൂല സാഹചര്യങ്ങളിലും പണിയെടുത്തുണ്ടാക്കുന്ന തുച്ഛമായ വരുമാനത്തിന്റെ നല്ലൊരു പങ്ക് നിത്യേനയുള്ള യാത്രാച്ചെലവിനായി മാറ്റിവെക്കേണ്ടി വരുന്ന ഈ പുരുഷ തൊഴിലാളികൾക്ക് മേലാണ് സർക്കാർ ഇപ്പോൾ ഇരട്ടി പ്രഹരം ഏൽപ്പിച്ചിരിക്കുന്നത്. ലക്ഷങ്ങൾ ശമ്പളം വാങ്ങുന്ന ഐ.ടി ജീവനക്കാരായ സ്ത്രീകൾക്കും ഉയർന്ന സർക്കാർ ഉദ്യോഗസ്ഥർക്കും വരെ സൗജന്യ യാത്ര അനുവദിക്കുമ്പോൾ, പട്ടിണി കിടക്കുന്ന സാധാരണക്കാരനായ ഒരു പുരുഷ തൊഴിലാളിക്ക് യാതൊരു ഇളവും നൽകാത്തത് എന്ത് തരം സാമൂഹിക നീതിയാണെന്ന് പൊതുസമൂഹം ചിന്തിക്കേണ്ടതുണ്ട്.

പൊതുജനങ്ങളുടെ നികുതിപ്പണത്തിൽ നിന്നാണ് കെ.എസ്.ആർ.ടി.സിയുടെ നഷ്ടം നികത്തുന്നതും സബ്‌സിഡികൾ നൽകുന്നതും. പുരുഷന്മാരും സ്ത്രീകളും ഒരേപോലെ നികുതി അടയ്ക്കുമ്പോൾ, അതിന്റെ ആനുകൂല്യം ഒരു വിഭാഗത്തിന് മാത്രം പൂർണ്ണമായി നൽകുകയും, കഠിനാധ്വാനം ചെയ്ത് നികുതിപ്പണത്തിന്റെ വലിയൊരു പങ്ക് ഖജനാവിലേക്ക് നൽകുന്ന പുരുഷന്മാരെ പൂർണ്ണമായി അവഗണിക്കുകയും ചെയ്യുന്നത് വഞ്ചനയാണ്. ലിംഗസമത്വം എന്നത് ഇരുവിഭാഗത്തിനും തുല്യമായ അവകാശങ്ങളും അവസരങ്ങളും നൽകലാണെന്നിരിക്കെ, ഒരു വിഭാഗത്തിന് മാത്രം അമിതമായ പ്രിവിലേജ് നൽകുന്നത് യഥാർത്ഥത്തിൽ ‘വിപരീത വിവേചനമാണ്’സൃഷ്ടിക്കുന്നത്. കേവലം വോട്ട് ബാങ്ക് ലക്ഷ്യം വെച്ച് ലിംഗാടിസ്ഥാനത്തിൽ മാത്രം ആനുകൂല്യങ്ങൾ വിഭജിക്കുന്നത് സമൂഹത്തിൽ ലിംഗസമത്വത്തിന് പകരം ലിംഗവിദ്വേഷം വളർത്താനേ ഉപകരിക്കൂ. തമിഴ്നാട്ടിൽ ഇതേ പദ്ധതി നടപ്പാക്കിയപ്പോൾ ബസുകളിൽ സീറ്റിനെച്ചൊല്ലി പുരുഷന്മാരും സ്ത്രീകളും തമ്മിൽ വലിയ തർക്കങ്ങളും കയ്യാങ്കളികളും ഉണ്ടായതും പുരുഷന്മാർ പരസ്യമായി അപമാനിക്കപ്പെട്ടതും നാം കണ്ടതാണ്.

ഇതിനുപുറമേ, കോടിക്കണക്കിന് രൂപയുടെ കടബാധ്യതയിലുള്ള കെ.എസ്.ആർ.ടി.സി എന്ന പൊതുമേഖലാ സ്ഥാപനത്തിന്റെ നിലനിൽപ്പിനെയും ഈ തീരുമാനം ദോഷകരമായി ബാധിക്കും. സ്ത്രീകളുടെ സൗജന്യ യാത്രയ്ക്കുള്ള തുക സർക്കാർ കൃത്യമായി കെ.എസ്.ആർ.ടി.സിക്ക് നൽകിയില്ലെങ്കിൽ വരുംദിവസങ്ങളിൽ കൂടുതൽ സർവീസുകൾ മുടങ്ങുകയും, അത് പുരുഷന്മാരടങ്ങുന്ന പൊതുജനങ്ങളുടെ യാത്ര കൂടുതൽ ദുരിതത്തിലാക്കുകയും ചെയ്യും. ചുരുക്കത്തിൽ, വോട്ട് ബാങ്ക് മാത്രം ലക്ഷ്യമിട്ടുള്ള ഈ ലിംഗാധിഷ്ഠിത വേർതിരിവ് അടിയന്തിരമായി പരിഷ്കരിക്കേണ്ടതുണ്ട്. ആനുകൂല്യങ്ങൾ നൽകേണ്ടത് ലിംഗത്തിന്റെ അടിസ്ഥാനത്തിലല്ല, മറിച്ച് സാമ്പത്തിക പിന്നോക്കാവസ്ഥയുടെ അടിസ്ഥാനത്തിലാണ്. ദാരിദ്ര്യരേഖയ്ക്ക് താഴെയുള്ളവർക്കും (BPL) സാധാരണക്കാരായ പുരുഷ തൊഴിലാളികൾക്കും ലിംഗഭേദമന്യേ ഇളവുകൾ നൽകാൻ സർക്കാർ തയ്യാറാകണം. പുരുഷന്റെ വിയർപ്പിനും കണ്ണീരിനും വിലയുണ്ടെന്ന് തിരിച്ചറിഞ്ഞ്, വിവേചനപരമായ ഈ നിലപാട് തിരുത്തി പുരുഷന്മാർക്കും തുല്യമായ യാത്രാ ആനുകൂല്യങ്ങൾ ലഭ്യമാക്കാൻ ഭരണകൂടം തയ്യാറാകുമ്പോൾ മാത്രമേ ഇവിടെ യഥാർത്ഥ സാമൂഹിക നീതി പുലരുകയുള്ളൂ.