കണ്ണൂർ: സ്കൂൾകാലം മുതലുള്ള സുഹൃത്തിനെ വീട്ടിൽ കയറി ചുറ്റികകൊണ്ട് ആക്രമിച്ച ശേഷം കടന്നുകളഞ്ഞയാളെ തീവണ്ടി ഇടിച്ച് മരിച്ച നിലയിൽ കണ്ടെത്തി. പാപ്പിനിശ്ശേരി പഴഞ്ചിറ സ്വദേശി പി.കെ.പി. ഷെഫീഖ് (43) ആണ് ശനിയാഴ്ച രാവിലെ റെയിൽവേ ട്രാക്കിൽ മരിച്ച നിലയിൽ കണ്ടെത്തിയത്.
സംഭവം നടന്നത് ഷെഫീഖിന്റെ വീട്ടിൽ നിന്ന് ഏകദേശം 300 മീറ്റർ അകലെയുള്ള പ്രശാന്തിന്റെ വീട്ടിലാണ്. ശനിയാഴ്ച രാവിലെ ഒൻപതോടെ ഷെഫീഖ് പ്രശാന്തിന്റെ വീട്ടിലെത്തി. ഇലക്ട്രീഷ്യനായ പ്രശാന്ത് അപ്പോൾ വീട്ടിൽ ഉണ്ടായിരുന്നില്ല. പിന്നീട് ഫോൺ വിളിച്ച് പ്രശാന്തിനെ വീട്ടിലേക്ക് വരുത്തുകയായിരുന്നു.
കുശലം പറഞ്ഞുകൊണ്ടിരിക്കുമ്പോൾ തണുത്ത വെള്ളം വേണമെന്ന് പറഞ്ഞ് പ്രശാന്തിനെ അടുക്കളയിലേക്ക് അയച്ച സമയത്ത് ഷെഫീഖ് ചുറ്റിക ഉപയോഗിച്ച് ആക്രമിച്ചുവെന്നാണ് വിവരം. തലക്കേറ്റ അടിയേറ്റ് പ്രശാന്ത് കുഴഞ്ഞുവീണതിന് പിന്നാലെ ഷെഫീഖ് സ്ഥലത്ത് നിന്ന് രക്ഷപ്പെട്ടു. നിലവിളി കേട്ട് എത്തിയ നാട്ടുകാർ പ്രശാന്തിനെ ആശുപത്രിയിൽ പ്രവേശിപ്പിച്ചു.
ഇതിനിടെ, രക്ഷപ്പെടുന്നതിനിടെയാണ് ഷെഫീഖിനെ റെയിൽവേ ട്രാക്കിൽ തീവണ്ടി ഇടിച്ചത് എന്നാണ് പ്രാഥമിക നിഗമനം. ആക്രമണം നടന്ന വീടും ട്രാക്കും തമ്മിൽ റെയിൽവേ ലൈൻ വഴി വളരെ അടുത്താണ് സ്ഥിതി ചെയ്യുന്നത്.
ആക്രമണത്തിന്റെ കാരണം വ്യക്തമല്ല. സംഭവത്തിൽ വളപട്ടണം പോലീസ് അന്വേഷണം ആരംഭിച്ചു. ഇരുവരും സ്കൂൾകാലം മുതൽ സുഹൃത്തുക്കളായിരുന്നു. ഷെഫീഖ് വിദേശത്ത് ജോലി ചെയ്തിരുന്നുവെന്നും അടുത്തകാലത്താണ് നാട്ടിലെത്തിയതെന്നും വിവരം ലഭിച്ചിട്ടുണ്ട്.
