തിരുവനന്തപുരം : സംസ്ഥാന ചരക്ക് സേവന നികുതി വകുപ്പ് സംഘടിപ്പിക്കുന്ന ‘ജി.എസ്.ടി രജിസ്ട്രേഷന് ഡ്രൈവ്’ എല്ലാ ജില്ലകളിലും ആരംഭിച്ചു.
കൂടുതല് വ്യാപാരികളെ ജി.എസ്.ടി സംവിധാനത്തിന്റെ പരിധിയിലേക്ക് കൊണ്ടുവരുന്നതിനും, ജി.എസ്.ടി റിട്ടേണുകള് ഫയല് ചെയ്യുന്നത് വര്ദ്ധിപ്പിക്കുന്നതിനും വേണ്ടിയാണ് ഇത് സംഘടിപ്പിക്കുന്നത്.
ഇതിന്റെ ഭാഗമായി സംസ്ഥാന തലത്തില് ക്യാമ്പയിനുകള് സംഘടിപ്പിക്കുമെന്ന് ധനകാര്യമന്ത്രി കെ.എന്. ബാലഗോപാല് പ്രഖ്യാപിച്ചിരുന്നു.
40 ലക്ഷത്തിന് മേല് വാര്ഷിക വിറ്റുവരവുള്ള, ചരക്കുകള് മാത്രം കൈകാര്യം ചെയ്യുന്ന വ്യാപാരികളും, ബിസിനസ്സില് സേവനം കൂടി ഉള്പ്പെടുന്നുണ്ടെങ്കില് 20 ലക്ഷത്തിന് മേല് വാര്ഷിക വിറ്റുവരവുള്ള ബിസിനസ്സുകാരും നിയമപ്രകാരം നിര്ബന്ധമായും ജി.എസ്.ടി രജിസ്ട്രേഷന് എടുക്കേണ്ടതാണ്.
ഇത് കൂടാതെ ചരക്ക് സേവന നികുതി നിയമം സെക്ഷന് 24ല് പരാമര്ശിച്ചിരിക്കുന്ന പ്രത്യേക സാഹചര്യത്തില് ഉള്പ്പെടുന്ന വ്യാപാരികള് വിറ്റ് വരവ് പരിധി കണക്കാക്കാതെ തന്നെ രജിസ്ട്രേഷന് എടുക്കേണ്ടതാണ്.
രജിസ്ട്രേഷന് എടുക്കുന്നത് മൂലം വ്യാപാരത്തിന് നിയമപരമായ അംഗീകാരം ലഭിക്കുന്നതോടൊപ്പം, ഇന്പുട്ട് ടാക്സ് ക്രെഡിറ്റിനുള്ള അര്ഹതയും, വിപണിയില് വളര്ച്ചയ്ക്കുള്ള വലിയ അവസരങ്ങളും, മറ്റ് ആനുകൂല്യങ്ങളും ഉറപ്പാക്കുന്നു.
രജിസ്ട്രേഷന് ഡ്രൈവുമായി ബന്ധപ്പെട്ട് സംസ്ഥാനത്തെ എല്ലാ ജില്ലകളിലും ഫീല്ഡ് സര്വേയ്ക്കായി ഉദ്യോഗസ്ഥരുടെ പ്രത്യേക സംഘം വ്യാപാര സ്ഥാപനങ്ങളില് നേരിട്ട് സന്ദര്ശനം നടത്തും.
രജിസ്ട്രേഷനെടുത്ത് വ്യാപാരം നടത്തുന്നതിനുള്ള ആവശ്യകതയെക്കുറിച്ച് വ്യാപാരികള്ക്കിടയില് അവബോധം സൃഷ്ടിക്കുന്നതിനും, രജിസ്ട്രേഷന് നടപടികള് വിശദീകരിക്കുന്നതിനുമാണ് ഈ പ്രത്യേക സംഘം വ്യാപാരികളെ സന്ദര്ശിക്കുന്നത്.
