നാരായൺഗഞ്ച്: ബംഗ്ലാദേശിൽ ‘ഡൊണാൾഡ് ട്രംപ്’ എന്ന പേരിൽ വൈറലായ പോത്തിനെ ബലി നൽകുന്നതിൽ നിന്ന് ഒഴിവാക്കി ദേശീയ മൃഗശാലയിലേക്ക് മാറ്റി. നെറ്റിയിലെ വെളുത്ത നിറവും മുടിയുടെ പ്രത്യേക രീതിയിലുള്ള ചീകലും മൂലമാണ് ഈ പോത്തിന് ‘ഡൊണാൾഡ് ട്രംപ്’ എന്ന പേര് സോഷ്യൽ മീഡിയയിൽ ലഭിച്ചത്. പോത്തിന്റെ വീഡിയോകൾക്ക് ലക്ഷക്കണക്കിന് കാഴ്ചക്കാരാണ് ലഭിച്ചിരുന്നത്.
ഏകദേശം 700 കിലോഗ്രാം ഭാരമുള്ള ഈ ആൽബിനോ പോത്തിനെ ബലി നൽകാനിരുന്നുവെന്ന വാർത്ത പുറത്തുവന്നതോടെ പൊതുജനങ്ങളുടെ ശ്രദ്ധയും താൽപര്യവും വർധിച്ചു. തുടർന്ന് സുരക്ഷാ കാരണങ്ങളും ജനശ്രദ്ധയും പരിഗണിച്ച് സർക്കാർ ഇടപെട്ട് മൃഗത്തെ വിലയ്ക്കെടുത്തതായാണ് റിപ്പോർട്ട്.
38 വയസ്സുകാരനായ ഉടമ സിയാ ഉദ്ദിൻ മൃദ മുമ്പ് ഈ പോത്തിനെ വിറ്റിരുന്നുവെങ്കിലും പിന്നീട് സർക്കാർ ഉദ്യോഗസ്ഥർ ഇടപെട്ട് അന്തിമമായി ഏറ്റെടുക്കുകയായിരുന്നു. തുടർന്ന് പോത്തിനെ ധാക്കയിലെ ബംഗ്ലാദേശ് ദേശീയ മൃഗശാലയിലേക്ക് മാറ്റി. ഇവിടെ ഇത് പൊതുജനങ്ങൾക്ക് പ്രദർശിപ്പിക്കുമെന്ന് അധികൃതർ അറിയിച്ചു.
വൈറലായതോടെ നിരവധി പേർ പോത്തിനെ കാണാനെത്തിയതോടെ സുരക്ഷാ പ്രശ്നങ്ങൾ ഉയർന്നതായും റിപ്പോർട്ടുകളുണ്ട്. ഇതേത്തുടർന്നാണ് മൃഗത്തെ സംരക്ഷിക്കാനും സന്ദർശകർക്ക് സുരക്ഷിതമായി കാണാനുമുള്ള നടപടിയായി മൃഗശാലയിൽ എത്തിച്ചതെന്ന് അധികൃതർ വ്യക്തമാക്കി. പോത്തിനെ ഇപ്പോൾ പ്രത്യേക എൻക്ലോസറിലാണ് പാർപ്പിച്ചിരിക്കുന്നത്.
അതേസമയം, സമാന രീതിയിൽ ‘ബെഞ്ചമിൻ നെതന്യാഹു’ എന്ന് പേരിട്ട മറ്റൊരു കൂറ്റൻ പോത്തും സോഷ്യൽ മീഡിയയിൽ ശ്രദ്ധ നേടുന്നുണ്ട്.
