​ദുബായ്: ഗൾഫ് രാജ്യമായ യുഎഇയിൽ ഈദുൽ ഫിത്തറിനോട് അനുബന്ധിച്ചുള്ള പൊതു അവധി ദിവസങ്ങൾ പ്രഖ്യാപിച്ചു. സർക്കാർ മേഖലയിലെ ജീവനക്കാർക്ക് നാല് ദിവസവും സ്വകാര്യ സ്ഥാപനങ്ങളിലെ ജീവനക്കാർക്ക് മൂന്ന് ദിവസവുമാണ് അവധി. നീണ്ട അവധികൾ കിട്ടിയതോടെ നാട്ടിലേക്ക് ടിക്കറ്റെടുക്കുന്ന പ്രവാസികളുടെ തിരക്കും വർധിച്ചിട്ടുണ്ട്. യുഎഇ മാനവശേഷി – സ്വദേശിവൽക്കരണ മന്ത്രാലയമാണ് അവധി പ്രഖ്യാപിച്ചത്. ഇതനുസരിച്ച് സർക്കാർ ജീവനക്കാർക്ക് മാർച്ച് 19 വ്യാഴാഴ്ച മുതൽ മാർച്ച് 22 ഞായറാഴ്ച വരെയാണ് അവധി ലഭിക്കുക. സ്വകാര്യ മേഖലയിലെ ജീവനക്കാർക്ക് മാർച്ച് 19 വ്യാഴാഴ്ച മുതൽ മാർച്ച് 21 ശനിയാഴ്ച വരെയാണ് പെരുന്നാൾ അവധി. എന്നാൽ ശവ്വാൽ മാസപ്പിറവി കാണാതിരിക്കുകയും റമദാൻ 30 പൂർത്തിയാക്കേണ്ടി വരികയും ചെയ്യുകയാണെങ്കിൽ ഇവർക്കും നാല് ദിവസം അവധി ലഭിക്കും.