കൊച്ചി: കേരള തീരത്തിന് സമീപം അറബിക്കടലിൽ മുങ്ങിയ MSC Elsa 3 കപ്പൽ സംബന്ധിച്ച വിഷയത്തിൽ സമഗ്രമായ പരിസ്ഥിതി ആഘാത പഠനം ഇതുവരെ നടത്താത്തത് വിമർശിച്ച് ഹൈക്കോടതി. ഈ വിഷയത്തിൽ സ്വതന്ത്രമായ പഠനം അനിവാര്യമാണെന്ന് കോടതി വ്യക്തമാക്കി.
ജസ്റ്റിസ് വി. രാജാ വിജയരാഘവൻ, ജസ്റ്റിസ് കെ.വി. ജയകുമാർ എന്നിവരടങ്ങുന്ന ഡിവിഷൻ ബെഞ്ചാണ് കേസ് പരിഗണിച്ചത്. കേന്ദ്ര പരിസ്ഥിതി-വനം-കാലാവസ്ഥ വ്യതിയാന മന്ത്രാലയത്തെ (Ministry of Environment, Forest and Climate Change) സ്വമേധയാ കേസിൽ കക്ഷിയാക്കി, വിഷയത്തിൽ വിശദമായ നിലപാട് അറിയിക്കാനും കോടതി നിർദേശിച്ചു.
പഠനം നടത്താൻ ഏത് ഏജൻസിയെ നിയോഗിക്കും, എങ്ങനെ പഠനം നടത്തും, എത്ര സമയത്തിനകം പൂർത്തിയാക്കും തുടങ്ങിയ വിവരങ്ങൾ സമർപ്പിക്കണമെന്നും കോടതി ആവശ്യപ്പെട്ടു. നിലവിലെ സാഹചര്യം വിശദീകരിച്ച് ഷിപ്പിങ് ഡയറക്ടർ ജനറലും കേന്ദ്ര പരിസ്ഥിതി മന്ത്രാലയവും റിപ്പോർട്ട് നൽകണമെന്നും നിർദേശമുണ്ട്. കപ്പൽ മുങ്ങിയ സ്ഥലത്ത് ഏകദേശം 50 മീറ്റർ ആഴത്തിലാണ് കപ്പൽ കിടക്കുന്നത്. കപ്പലിനകത്തും കടലിന്റെ അടിത്തട്ടിലും നിരവധി കണ്ടെയ്നറുകൾ ഇപ്പോഴും അവശേഷിക്കുന്നു. ആകെ 643 കണ്ടെയ്നറുകളിൽ 72 എണ്ണം മാത്രമാണ് ഇതുവരെ വീണ്ടെടുത്തത്.
ഇന്ത്യൻ കോസ്റ്റ് ഗാർഡ് നൽകിയ റിപ്പോർട്ട് പ്രകാരം കപ്പലിൽ അപകടകാരിയായ കാൽസ്യം കാർബൈഡും വലിയ അളവിൽ പ്ലാസ്റ്റിക് നർഡിൽസും ഉണ്ടെന്ന് പറയുന്നു. ഇത് മൺസൂൺ കാലത്ത് വലിയ പരിസ്ഥിതി ഭീഷണി സൃഷ്ടിക്കാമെന്ന ആശങ്കയും ഉയർന്നിട്ടുണ്ട്. കപ്പൽ ഉടമകൾ കപ്പൽ ഇപ്പോൾ ഭീഷണിയില്ലെന്ന് വാദിക്കുന്നുവെങ്കിലും, സർക്കാർ ഏജൻസികളും കോടതിയും ഈ നിലപാട് പൂർണമായി അംഗീകരിച്ചിട്ടില്ല. വിഷയം ജൂൺ 23-ന് വീണ്ടും ഹൈക്കോടതി പരിഗണിക്കും.
