തിരുവനന്തപുരം: ഉത്തരേന്ത്യയില് മഴ കനത്ത സാഹചര്യത്തില് ഇന്ന് ഉച്ചയ്ക്കു 2.15ന് പുറപ്പെടേണ്ട കന്യാകുമാരി കത്ര ഹിമസാഗര് എക്സ്പ്രസ് എന്നിവ റദ്ദാക്കി. കന്യാകുമാരിയില് നിന്നും പുറപ്പെടുന്ന ട്രെയിന് നാലുദിവസം എടുത്താണ് കത്രയിലെ മാതാ വൈഷ്ണോ ദേവി സ്റ്റേഷനില് എത്തുന്നത്.
മാതാ വൈഷ്ണോ ദേവി യാത്രാ ട്രാക്കിലാണ് മേഘസ്ഫോടനത്തെ തുടര്ന്ന് ഉണ്ടായ മണ്ണിടിച്ചില് ഏറ്റവും വലിയ നാശം നേരിട്ടത്. കൂടുതല് ആളുകള് കുടുങ്ങിക്കിടക്കുന്നുണ്ടോ എന്ന് കണ്ടെത്താന് രക്ഷാപ്രവര്ത്തകര് അവശിഷ്ടങ്ങള്ക്കിടയില് തിരച്ചില് തുടരുകയാണ്. ഇതിനിടെയാണ് കേരളത്തില് നിന്നും ഏറ്റവുമധികം പേര് ആശ്രയിക്കുന്ന കന്യാകുമാരി കത്ര ഹിമസാഗര് എക്സ്പ്രസ് റദ്ദാക്കിയത്.
ജമ്മു കശ്മീരിലെ പല ഭാഗങ്ങളിലും കനത്ത മഴയും മേഘവിസ്ഫോടനവും മൂലം ഉണ്ടായ വെള്ളപ്പൊക്കത്തില് വലിയ നാശനഷ്ടമാണ് ഉണ്ടായത്. കഴിഞ്ഞ 24 മണിക്കൂറിനുള്ളില് 10 മരണങ്ങള് കൂടി അധികൃതര് സ്ഥിരീകരിച്ചതോടെ മരണസംഖ്യ 45 ആയി. മണ്ണിടിച്ചിലില് പാലങ്ങള് തകരുകയും വൈദ്യുതി ലൈനുകള്ക്കും മൊബൈല് ടവറുകള്ക്കും സാരമായ കേടുപാടുകള് സംഭവിക്കുകയും ചെയ്തു. കാലാവസ്ഥയില് ഗണ്യമായ പുരോഗതി ഉണ്ടായതിനെത്തുടര്ന്ന് വ്യാഴാഴ്ച ഝലം, ചെനാബ് തുടങ്ങിയ പ്രധാന നദികളിലെ ജലനിരപ്പ് കുറഞ്ഞിരുന്നു. ഇതോടെ അധികൃതര് രക്ഷാപ്രവര്ത്തനങ്ങള് വേഗത്തിലാക്കി.
