മുംബൈ: വനിതാ ഏകദിന ലോകകപ്പിനുള്ള ഇന്ത്യന് ടീമിനെ പ്രഖ്യാപിച്ചു. നീതു ഡേവിഡിന്റെ നേതൃത്വത്തിലുള്ള സെലക്ഷന് കമ്മിറ്റിയാണ് ടീം പ്രഖ്യാപനം നടത്തിയത്. ഹര്മന്പ്രീത് കൗര് നയിക്കുന്ന ടീമില് സ്മൃതി മന്ദാനയാണ് വൈസ് ക്യാപ്റ്റന്. ഓപ്പണര് ഷഫാലി വര്മയെ ടീമിലേക്ക് പരിഗണിച്ചില്ല. ഓസ്ട്രേലിയന് പര്യടനത്തിലെ ഇന്ത്യ എ ടി20 ടീമിന്റെ വൈസ് ക്യാപ്റ്റനായിരുന്നു മലയാളി താരം മിന്നുമണിക്കും ലോകകപ്പ് ടീമില് ഇടം നേടാനായില്ല. പ്രതീക റാവലാണ് സ്മൃതി മന്ദാനക്കൊപ്പം ഓപ്പണറായി ടീമിലെത്തിയത്. ലോകകപ്പിന് പുറമെ ഓസ്ട്രേലിയക്കെതിരായ ഏകദിന പരമ്പരക്കുള്ള ഇന്ത്യന് ടീമിനെയും പ്രഖ്യാപിച്ചിട്ടുണ്ട്.
വനിതാ ഏകദിന ലോകകപ്പിനുള്ള ഇന്ത്യന് ടീം: ഹര്മന്പ്രീത് കൗര് (ക്യാപ്റ്റന്), സ്മൃതി മന്ദാന(വൈസ് ക്യാപ്റ്റന്), പ്രതീക റാവല്, ഹര്ലീന് ഡിയോള്, ദീപ്തി ശര്മ, ജെമിമ റോഡ്രിഗസ്, രേണുക താക്കൂര്, അരുന്ധതി റെഡ്ഡി, റിച്ച ഘോഷ് (വിക്കറ്റ് കീപ്പര്), ക്രാന്തി ഗൗഡ്, അമന്ജോത് കൗര്, രാധാ യാദവ്, ശ്രീ ചരണി, യാസ്തിക ഭാട്ടിക(വിക്കറ്റ് കീപ്പര്),സ്നേഹ് റാണ.
