റോഹ്ത്തക്ക്: അന്താരാഷ്ട്ര കബഡി താരമായ ഷീലു ബൽഹാരയുടെ ഭാര്യ മസ്കൻ ബൽഹാര (23)യെ വീട്ടിൽ മരിച്ച നിലയിൽ കണ്ടെത്തി. ഹരിയാണയിലെ ബാഹു അക്ബർപുർ ഗ്രാമത്തിലെ വീട്ടിൽ വെള്ളിയാഴ്ചയാണ് സംഭവം നടന്നത്. മസ്കന്റെ മരണത്തിന് പിന്നിൽ ഭർതൃപീഡനമാണെന്ന് ആരോപിച്ച് കുടുംബം രംഗത്തെത്തി. മരണവിവരം അറിഞ്ഞെത്തിയ ബന്ധുക്കൾ ഷീലു ബൽഹാരയുടെ വീടിന് മുന്നിൽ പ്രതിഷേധിക്കുകയും ചെയ്തു.

സംഭവത്തിൽ ഷീലു ബൽഹാരയെയും കുടുംബാംഗങ്ങളെയും പൊലീസ് ചോദ്യം ചെയ്തുവരികയാണ്. ഫൊറൻസിക് സംഘവും സ്ഥലത്തെത്തി പരിശോധന നടത്തി. മസ്കന്റെ മൃതദേഹം പോസ്റ്റ്മോർട്ടത്തിനായി റോഹ്ത്തക്കിലെ ആശുപത്രിയിലേക്ക് മാറ്റി. ഫർമാന സ്വദേശിനിയായ മസ്കനും ഷീലു ബൽഹാരയും 2023 ഡിസംബറിലാണ് വിവാഹിതരായത്. ദമ്പതികൾക്ക് ഒൻപത് മാസം പ്രായമുള്ള ഒരു മകനുണ്ട്. സംഭവത്തിൽ പൊലീസ് അന്വേഷണം തുടരുകയാണ്. മരണത്തിന്റെ യഥാർത്ഥ കാരണം പോസ്റ്റ്മോർട്ടം റിപ്പോർട്ടും അന്വേഷണവും പൂർത്തിയായ ശേഷമേ വ്യക്തമാകൂ.