ശ്രീഹരിക്കോട്ട: ഇന്ത്യൻ ബഹിരാകാശ ഏജൻസിയായ ഐഎസ്ആർഒയുടെ പിഎസ്എൽവി-സി62 / ഇഒഎസ്-എൻ1 ദൗത്യം വിജയകരമായി വിക്ഷേപിച്ചു. ശ്രീഹരിക്കോട്ടയിലെ സതീഷ് ധവാൻ സ്പേസ് സെന്ററിലെ ആദ്യ ലോഞ്ച് പാഡിൽ നിന്ന് ഇന്ന് രാവിലെ 10.17-നാണ് വിക്ഷേപണം നടന്നത്. ഡിആർഡിഒയുടെ ഭൗമനിരീക്ഷണ ഉപഗ്രഹമായ ‘അന്വേഷ’ (EOS-N1) ഉൾപ്പെടെ 16 പേലോഡുകളാണ് പിഎസ്എൽവി ബഹിരാകാശത്തേക്ക് എത്തിച്ചത്.
കഴിഞ്ഞ വർഷം നേരിട്ട അപ്രതീക്ഷിത പരാജയത്തിന് ശേഷമുള്ള പിഎസ്എൽവിയുടെ ആദ്യ ദൗത്യമെന്ന നിലയിലും, 2026-ലെ ഐഎസ്ആർഒയുടെ ആദ്യ വിക്ഷേപണമെന്ന നിലയിലും ഈ ദൗത്യം ശ്രദ്ധേയമാണ്. വിശ്വസനീയമായ വിക്ഷേപണ വാഹനമായ പിഎസ്എൽവിയെ വീണ്ടും ദൗത്യത്തിന് ഉപയോഗിച്ചതോടെ ഐഎസ്ആർഒയ്ക്ക് ഇത് അഭിമാന നിമിഷമായി.
പിഎസ്എൽവി-സി62 ദൗത്യത്തിലൂടെ അത്യാധുനിക ഹൈപ്പർ സ്പെക്ട്രൽ ഇമേജിംഗ് സാങ്കേതികവിദ്യയുള്ള ഭൗമനിരീക്ഷണ ഉപഗ്രഹമായ ‘അന്വേഷ’ ഉൾപ്പെടെ പതിനാറ് ഉപഗ്രഹങ്ങളാണ് ഭ്രമണപഥത്തിലെത്തിച്ചത്. ഡിഫൻസ് റിസർച്ച് ആൻഡ് ഡെവലപ്മെന്റ് ഓർഗനൈസേഷൻ (ഡിആർഡിഒ) വികസിപ്പിച്ച ‘അന്വേഷ’ ഉപഗ്രഹം ഇഒഎസ്-എൻ1 എന്ന പേരിലും അറിയപ്പെടുന്നു.
