ബെംഗളൂരു: മണിരത്നം തിരക്കഥയെഴുതി സംവിധാനം ചെയ്യുന്ന തമിഴ് ഭാഷാ ഗ്യാങ്സ്റ്റർ ആക്ഷൻ ഡ്രാമ ചിത്രം ‘തഗ് ലൈഫ്’ കർണാടകയിൽ നിരോധിക്കുന്നത് നിയമവിരുദ്ധമെന്ന് ചൂണ്ടിക്കാട്ടി കമൽഹാസൻ ഹൈക്കോടതിയിൽ. കമൽഹാസന് വേണ്ടി രാജ് കമൽ ഇന്റർനാഷണലാണ് കർണാടക ഹൈക്കോടതിയിൽ ഹർജി നൽകിയത്.
കന്നഡ തമിഴിൽ നിന്നും ഉദ്ഭവിച്ചതാണെന്ന, പ്രമോഷൻ പരിപാടിക്കിടെ കമൽഹാസൻ നടത്തിയ പരാമർശത്തിന് പിന്നാലെയാണ് കർണാടക ഫിലിം ചേംബർ ചിത്രത്തിന് സംസ്ഥാനത്ത് നിരോധനമേർപ്പെടുത്തിയത്. പരാമർശത്തിൽ മാപ്പ് പറയില്ലെന്ന് കമൽഹാസൻ നിലപാടെടുത്തതോടെയാണ് ഫിലിം ചേംബർ കർണാടകയിൽ സിനിമ പ്രദർശിപ്പിക്കില്ലെന്ന് തീരുമാനിച്ചത്. കമൽഹാസന്റെ വാക്കുകൾ സാഹചര്യത്തിൽ നിന്ന് അടർത്തിമാറ്റി വളച്ചൊടിച്ചെന്നാണ് ഹർജിയിൽ സൂചിപ്പിക്കുന്നത്. ജൂൺ 5-നാണ് തഗ് ലൈഫിന്റെ ആഗോള റിലീസ്.
തഗ് ലൈഫിന്റെ പ്രചാരണത്തിനായി നടന്ന ഒരു പരിപാടിയിൽ സാൻഡൽവുഡ് സൂപ്പർസ്റ്റാർ ശിവ രാജ്കുമാറിനെ “സ്വന്തം സഹോദരൻ” ആയി സ്വാഗതം ചെയ്യുന്നതിനിടെ, കന്നഡയുടെ അമ്മ തമിഴ് ആണെന്ന് കമൽഹാസൻ ഈ ആഴ്ച ആദ്യം പറഞ്ഞിരുന്നു. അതേസമയം “കമൽഹാസൻ പറഞ്ഞതിൽ തെറ്റൊന്നുമില്ല. അദ്ദേഹം ലളിതമായി പറഞ്ഞ വസ്തുത, മുൻകാലങ്ങളിൽ പല വിദഗ്ധരും ഇത് അംഗീകരിച്ചിട്ടുണ്ട്. കന്നഡ, മലയാളം, തെലുങ്ക് ഭാഷകൾ സംസാരിക്കുന്ന ആളുകൾക്ക് തമിഴ് അവരുടെ ഭാഷകളുടെ മാതാവാണെന്ന് അംഗീകരിക്കാൻ ബുദ്ധിമുട്ടായിരിക്കാം. സത്യം അംഗീകരിക്കാൻ എപ്പോഴും ബുദ്ധിമുട്ടാണ്,” തിരുമാവളവൻ പറഞ്ഞു.
