കോഴിക്കോട്: കാന്തപുരം എ.പി. അബൂബക്കർ മുസ്ലിയാരുടെ വിവാദ സ്ത്രീവിരുദ്ധ പരാമർശത്തിൽ പ്രതികരിക്കാതെ മുസ്ലിം ലീഗ് മന്ത്രിമാരായ എൻ. ഷംസുദ്ദീനും കെ.എം. ഷാജിയും. മാധ്യമപ്രവർത്തകർ വിഷയത്തിൽ പ്രതികരണം തേടിയെങ്കിലും ഇരുവരും നിലപാട് വ്യക്തമാക്കാതെ ഒഴിഞ്ഞുമാറുകയായിരുന്നു.
“പണ്ഡിതന്മാർ പറഞ്ഞതല്ലേ, അതിന് ഞാൻ മറുപടി പറയുന്നില്ല. അതിൽ എന്റെ ഒരു കമന്റിന്റെ ആവശ്യമില്ല,” എന്നായിരുന്നു എൻ. ഷംസുദ്ദീന്റെ പ്രതികരണം.
വിഷയത്തിൽ പ്രതികരിക്കാനില്ലെന്നായിരുന്നു കെ.എം. ഷാജിയുടെ നിലപാട്. മുസ്ലിം സമൂഹത്തിൽ നിരവധി ആളുകളുണ്ടെന്നും അവരോട് ചോദിച്ചാൽ മതിയെന്നും ഷാജി പറഞ്ഞു. കാന്തപുരത്തിന്റെ പരാമർശം സ്ത്രീ വിരുദ്ധമാണെന്ന് തോന്നുന്നില്ലേയെന്ന മാധ്യമപ്രവർത്തകന്റെ ചോദ്യത്തിനും “അതിന് കമന്റ് ചെയ്യുന്നില്ല” എന്നായിരുന്നു മറുപടി.
ഒരു വിഷയത്തിൽ പ്രതികരിക്കുന്നില്ലെന്ന് പറയുന്നതിന്റെ അർഥം താൻ പ്രതികരിക്കുന്നില്ല എന്നുതന്നെയാണെന്നും, തന്റെ അഭിപ്രായം സൂക്ഷിക്കാനുള്ള സ്വാതന്ത്ര്യം തനിക്കുണ്ടെന്നും ഷാജി വ്യക്തമാക്കി. വിഷയത്തിന്റെ ഗൗരവം തന്റെ പ്രതികരണത്തിലൂടെ മാത്രം നിർണയിക്കേണ്ടതില്ലെന്നും അദ്ദേഹം പറഞ്ഞു.
നബിദിനാഘോഷങ്ങളിൽ സ്ത്രീകളെ പങ്കെടുപ്പിക്കുന്നതിനെതിരെ മഹല്ലുകൾക്കും മദ്രസകൾക്കും നിർദേശമെന്ന നിലയിൽ കാന്തപുരം നടത്തിയ പ്രസ്താവനയാണ് വിവാദമായത്. അന്യപുരുഷന്മാർക്കിടയിൽ വേദിയിലോ പൊതുസ്ഥലങ്ങളിലോ സ്ത്രീകളെ കൊണ്ടുവരരുതെന്നും ആഘോഷങ്ങൾ അതിരുകടക്കുന്നത് തടയണമെന്നുമായിരുന്നു നിർദേശം.
പ്രസ്താവനയ്ക്കെതിരെ എസ്.എഫ്.ഐ, ഡി.വൈ.എഫ്.ഐ തുടങ്ങിയ ഇടതുപക്ഷ സംഘടനകൾ രംഗത്തെത്തി. സ്ത്രീകൾ പൊതുവേദികളിൽ വരുന്നതിനെ ‘പ്രദർശനം’ എന്ന് വിശേഷിപ്പിക്കുന്നത് സ്ത്രീവിരുദ്ധവും അസഹിഷ്ണുതാപരവുമാണെന്ന് എസ്.എഫ്.ഐ വിമർശിച്ചു. പ്രസ്താവന സ്ത്രീവിരുദ്ധവും കാലഘട്ടത്തിന് നിരക്കാത്തതുമാണെന്നായിരുന്നു ഡി.വൈ.എഫ്.ഐയുടെ പ്രതികരണം.
വിമർശനങ്ങൾ ശക്തമായിട്ടും നിലപാടിൽ ഉറച്ചുനിന്ന കാന്തപുരം, സ്ത്രീകളെ പൊതുരംഗത്തിറക്കിയാൽ വലിയ നാശമുണ്ടാകുമെന്ന നിലപാട് ആവർത്തിച്ചു. സ്ത്രീകൾ വീട്ടിൽ അടങ്ങി ഒതുങ്ങി ജീവിക്കണമെന്നാണ് ഖുർആൻ പഠിപ്പിക്കുന്നതെന്നും സ്ത്രീകൾ പൊതുവേദികളിൽ ഇറങ്ങിയാൽ വലിയ നാശമുണ്ടാകുമെന്നും അദ്ദേഹം പറഞ്ഞിരുന്നു.
കാന്തപുരത്തിന്റെ പരാമർശത്തിനെതിരെ സി.പി.ഐ.എം നേതാവ് പി.കെ. ശ്രീമതിയും രംഗത്തെത്തി. കാന്തപുരം വീണ്ടും സ്ത്രീ വിരോധം പ്രകടിപ്പിച്ചുവെന്നായിരുന്നു ശ്രീമതിയുടെ വിമർശനം.
അതേസമയം, സ്ത്രീകൾ പുറത്തിറങ്ങരുതെന്ന നിലപാട് പൊതുസമൂഹത്തിന് സ്വീകാര്യമല്ലെന്ന് മന്ത്രി ബിന്ദു കൃഷ്ണ പ്രതികരിച്ചു. ജനപ്രതിനിധികളായ സ്ത്രീകൾ സത്യസന്ധമായി പ്രവർത്തിക്കുന്നുണ്ടെന്നും കൂടുതൽ സ്ത്രീകൾ പൊതുരംഗത്തേക്ക് കടന്നുവരണമെന്നുമായിരുന്നു മന്ത്രി സണ്ണി ജോസഫിന്റെ പ്രതികരണം.
