തൃശൂർ: കാട്ടാകാമ്പാൽ ഗ്രാമ പഞ്ചായത്ത് വർക്കിംഗ് കമ്മിറ്റി യോഗം ചിറക്കൽ സംഗമം പാലസിൽ നടന്നു. പഞ്ചായത്ത് പ്രസിഡന്റ് കെ. ജയശങ്കർ യോഗം ഉദ്ഘാടനം ചെയ്തു. തൃശൂർ ജില്ലാ പഞ്ചായത്ത് അംഗം പ്രശാന്ത് മാസ്റ്റർ വിശിഷ്ടാതിഥിയായി പങ്കെടുത്തു. ബ്ലോക്ക് പഞ്ചായത്ത് അംഗങ്ങളായ സന്ധ്യ സജിത്ത്, വിജയ ഗോപി എന്നിവർ യോഗത്തിൽ സന്നിഹിതരായിരുന്നു.ഗ്രാമ പഞ്ചായത്തിന്റെ ഭരണ–വികസന പ്രവർത്തനങ്ങൾ കൂടുതൽ കാര്യക്ഷമവും സുതാര്യവും ആക്കുന്നതിനുള്ള നടപടികൾ യോഗത്തിൽ ചർച്ച ചെയ്തു.

വിവിധ മേഖലകളിലെ പ്രവർത്തനങ്ങൾ ഏകോപിപ്പിച്ച് മുന്നോട്ട് കൊണ്ടുപോകുന്നതിനായി 13 വർക്കിംഗ് കമ്മിറ്റികൾ രൂപീകരിച്ചതായി യോഗത്തിൽ അറിയിച്ചു. പഞ്ചായത്തിന്റെ വികസന പദ്ധതികൾ സമയബന്ധിതമായി നടപ്പാക്കുന്നതിനും ജനക്ഷേമ പ്രവർത്തനങ്ങൾ ശക്തിപ്പെടുത്തുന്നതിനും വർക്കിംഗ് കമ്മിറ്റികൾ മുഖ്യപങ്ക് വഹിക്കുമെന്ന് പഞ്ചായത്ത് പ്രസിഡന്റ് കെ. ജയശങ്കർ പറഞ്ഞു. യോഗത്തിൽ പങ്കെടുത്ത ജനപ്രതിനിധികൾ പഞ്ചായത്തിന്റെ ഭാവി വികസന ദിശകൾ സംബന്ധിച്ച അഭിപ്രായങ്ങൾ പങ്കുവെക്കുകയും, പ്രവർത്തനങ്ങൾ ഏകോപിപ്പിച്ച് മുന്നോട്ട് കൊണ്ടുപോകാനുള്ള തീരുമാനങ്ങൾ കൈക്കൊള്ളുകയും ചെയ്തു.