കൊച്ചി: ഇന്ത്യൻ സൂപ്പർ ലീഗ് പോരാട്ടങ്ങൾക്കുള്ള കേരള ബ്ലാസ്റ്റേഴ്സ് എഫ്.സി സ്ക്വാഡിനെ ഔദ്യോഗികമായി പ്രഖ്യാപിച്ചു. ഓരോ പൊസിഷനിലും മികച്ച പോരാട്ടം ഉറപ്പാക്കുന്ന രീതിയിലുള്ള മാറ്റങ്ങളാണ് ടീമിൽ വരുത്തിയിട്ടുള്ളത്. ഹെഡ് കോച്ച് ഡേവിഡ് കറ്റാലയുടെ കീഴിൽ ഒരേ ലക്ഷ്യത്തോടെ മുന്നേറാൻ ശേഷിയുള്ള ഒരു സംഘത്തെയാണ് ക്ലബ്ബ് അണിനിരത്തുന്നത്.
ഗോൾകീപ്പിംഗ് വിഭാഗത്തിൽ സച്ചിൻ സുരേഷ്, അർഷ് ഷെയ്ഖ് എന്നിവർ ടീമിന് ആത്മവിശ്വാസം പകരും. പ്രതിരോധനിരയിൽ വിദേശ താരം ഉമർ ബാഹും ഇന്ത്യ അണ്ടർ-23 ക്യാപ്റ്റൻ ബികാഷ് യുംനാമും പ്രധാന ചുമതല വഹിക്കും.
മധ്യനിരയിൽ മർലോൺ റൂസ്, വിബിൻ മോഹനൻ എന്നിവർക്ക് കളിയുടെ നിയന്ത്രണവും മുന്നേറ്റങ്ങൾക്ക് തുടക്കമിടുന്നതുമായ ഉത്തരവാദിത്തമുണ്ട്. മുന്നേറ്റനിരയിൽ വിക്ടർ ബെർട്ടോമിയു, കെവിൻ യോക്ക് എന്നിവരുടെ സാന്നിധ്യം പരിശീലകസംഘത്തിന് തന്ത്രങ്ങളിൽ വൈവിധ്യം വരുത്താൻ സഹായകരമാകും.
നിലവിലെ ഇന്ത്യൻ ഫുട്ബോൾ സാഹചര്യങ്ങളിൽ മികച്ച പോരാട്ടം കാഴ്ചവെക്കുന്നതോടൊപ്പം, താരങ്ങളുടെ വളർച്ചയ്ക്കും ടീമിനുള്ളിലെ ഒത്തൊരുമയ്ക്കും മുൻഗണന നൽകിയാണ് സ്ക്വാഡ് തയ്യാറാക്കിയിരിക്കുന്നത്.
