പാലക്കാട്: പാലക്കാട് സിപിഎം ജില്ലാ സെക്രട്ടറി സ്ഥാനത്തുനിന്ന് ഇ.എൻ. സുരേഷ് ബാബുവിനെ മാറ്റിയതുമായി ബന്ധപ്പെട്ട പരാതികളെക്കുറിച്ച് വ്യക്തമായ വിവരമില്ലെന്ന് സിപിഎം നേതാവ് കെ.കെ. ശൈലജ. കാര്യങ്ങൾ കൃത്യമായി അറിയാതെ ഊഹത്തിന്റെ അടിസ്ഥാനത്തിൽ പ്രതികരിക്കാനാകില്ലെന്നും ശൈലജ വ്യക്തമാക്കി.
പാലക്കാട് ജില്ലയുടെ ചുമതല തനിക്കില്ലെന്നും നിലവിൽ മാധ്യമങ്ങളിലൂടെ പുറത്തുവരുന്ന വിവരങ്ങൾ മാത്രമാണ് ശ്രദ്ധയിൽപ്പെട്ടിട്ടുള്ളതെന്നും അവർ പറഞ്ഞു. സുരേഷ് ബാബുവിനെ മാറ്റാനുള്ള യഥാർഥ കാരണം സംസ്ഥാന സെക്രട്ടേറിയറ്റ് യോഗം ചേരുമ്പോഴാണ് കൂടുതൽ വ്യക്തമാകുകയെന്നും ശൈലജ പറഞ്ഞു.
പാർട്ടി പ്രവർത്തകരുടെ ഭാഗത്തുനിന്ന് വീഴ്ചയുണ്ടായാൽ കർശന നടപടി സ്വീകരിക്കുന്നതാണ് സിപിഎമ്മിന്റെ രീതിയെന്നും ചെറിയ കുറ്റങ്ങളിൽ പോലും പാർട്ടി നടപടിയെടുക്കാറുണ്ടെന്നും ശൈലജ പറഞ്ഞു. പാർട്ടി ഒരു കോടതിയല്ലെന്നും സംഘടനയ്ക്ക് അകത്ത് ചർച്ച ചെയ്ത് സ്വീകരിക്കാവുന്ന പരമാവധി നടപടികളാണ് സ്വീകരിക്കുന്നതെന്നും അവർ വ്യക്തമാക്കി.
അതേസമയം, ക്രിമിനൽ കുറ്റം നടന്നിട്ടുണ്ടെങ്കിൽ സ്വാഭാവികമായും അത് നിയമസംവിധാനത്തിന് മുന്നിലെത്തേണ്ടതുണ്ടെന്നും ശൈലജ പറഞ്ഞു. എന്നാൽ സുരേഷ് ബാബുവിനെതിരെ ഉയർന്നതായി പറയപ്പെടുന്ന പരാതിയുടെ വിശദാംശങ്ങൾ പോലും തനിക്ക് അറിയില്ലാത്തതിനാൽ ഇക്കാര്യത്തിൽ കൂടുതൽ പ്രതികരിക്കുന്നത് ശരിയല്ലെന്നും അവർ വ്യക്തമാക്കി.
സ്ത്രീയോട് മോശമായി പെരുമാറിയെന്ന തരത്തിലുള്ള പരാതി ഉണ്ടോ എന്നതുപോലും തനിക്ക് വ്യക്തമായി അറിയില്ലെന്നും കാര്യങ്ങൾ വ്യക്തമായാൽ അതനുസരിച്ച് പ്രതികരിക്കാമെന്നും ശൈലജ പറഞ്ഞു. പാർട്ടിക്കുള്ളിൽ ഉയരുന്ന പരാതികളിൽ സംഘടനയ്ക്ക് സ്വീകരിക്കാവുന്ന നടപടികൾ ചർച്ച ചെയ്ത് തീരുമാനിക്കുമെന്നും, നിയമപരമായ കുറ്റകൃത്യമാണെങ്കിൽ അത് നിയമസംവിധാനത്തിന് കൈമാറേണ്ടതുണ്ടെന്നും അവർ കൂട്ടിച്ചേർത്തു.
ഇതിനിടെ, ഇ.എൻ. സുരേഷ് ബാബുവിനെ ജില്ലാ സെക്രട്ടറി സ്ഥാനത്തുനിന്ന് മാറ്റി വി. ചെന്താമരാക്ഷനെ പുതിയ ജില്ലാ സെക്രട്ടറിയായി തെരഞ്ഞെടുത്തിരുന്നു. സംസ്ഥാന സെക്രട്ടറി എം.വി. ഗോവിന്ദൻ ഉൾപ്പെടെയുള്ള നേതാക്കൾ പങ്കെടുത്ത യോഗത്തിലായിരുന്നു തീരുമാനം.
സുരേഷ് ബാബുവിന്റെ മാറ്റത്തിന് പിന്നിൽ വനിതാ നേതാവിന്റെ പരാതിയുൾപ്പെടെയുള്ള ആരോപണങ്ങളുണ്ടെന്ന റിപ്പോർട്ടുകൾ പുറത്തുവന്നിട്ടുണ്ട്. എന്നാൽ പാർട്ടി നേതൃത്വത്തിലെ ചിലർ പരാതി ലഭിച്ചിട്ടില്ലെന്നാണ് വ്യക്തമാക്കിയിട്ടുള്ളത്. ഇതോടെ സുരേഷ് ബാബുവിനെ മാറ്റിയതിന്റെ യഥാർഥ കാരണം സംബന്ധിച്ച് ഔദ്യോഗിക വിശദീകരണത്തിനായി കാത്തിരിക്കുകയാണ്.
