തൃശ്ശൂർ: വൈദ്യുതി നിയന്ത്രണത്തെ തുടർന്ന് കെഎസ്ഇബി ജീവനക്കാരന് മർദനമേറ്റതായി പരാതി. മാള അന്നമനട കെഎസ്ഇബി ഓഫീസിലെ താൽക്കാലിക ജീവനക്കാരനായ നിധിനാണ് ആക്രമണത്തിൽ പരിക്കേറ്റത്. അന്നമനടയിലെ 33 കെവി സബ്സ്റ്റേഷനിലാണ് സംഭവം നടന്നത്. ഒരു സംഘം യുവാക്കൾ നിധിനെ മുളവടി ഉപയോഗിച്ച് മർദിക്കുന്ന സിസിടിവി ദൃശ്യങ്ങൾ പുറത്തുവന്നിട്ടുണ്ട്.
അർജന്റീന- ഇംഗ്ലണ്ട് ലോകകപ്പ് സെമി ഫൈനൽ മത്സരത്തിന് മുമ്പ് അന്നമനടയിൽ വൈദ്യുതി മുടങ്ങിയിരുന്നു. ഇതിന് പിന്നാലെ ഓഫീസിലെത്തിയ സംഘം ജീവനക്കാരോട് അസഭ്യം പറയുകയും പിന്നീട് ആക്രമിക്കുകയുമായിരുന്നുവെന്നാണ് പരാതി. പരിക്കേറ്റ നിധിനെ മാളയിലെ സ്വകാര്യ ആശുപത്രിയിൽ പ്രവേശിപ്പിച്ചു. സംഭവത്തിൽ മാള പൊലീസ് കേസെടുത്ത് അന്വേഷണം ആരംഭിച്ചു. സിസിടിവി ദൃശ്യങ്ങൾ പൊലീസ് പരിശോധിച്ചുവരികയാണ്.
അതേസമയം, ഫുട്ബോൾ മത്സരം നടക്കുന്നതിനിടെ സംസ്ഥാനത്തിന്റെ വിവിധ ഭാഗങ്ങളിൽ വൈദ്യുതി മുടങ്ങിയതിനെതിരെ പ്രതിഷേധങ്ങളും ഉണ്ടായിരുന്നു. തൃശ്ശൂർ എരുമപ്പെട്ടിയിലെ കെഎസ്ഇബി ഓഫീസിൽ ഡിവൈഎഫ്ഐ പ്രവർത്തകർ ഉപരോധ സമരം നടത്തി. മലപ്പുറം പരിയാപുരത്തെ കെഎസ്ഇബി ഓഫീസിലും ഡിവൈഎഫ്ഐ പ്രവർത്തകർ മെഴുകുതിരി തെളിച്ച് പ്രതിഷേധിച്ചിരുന്നു.
