കുവൈത്ത് സിറ്റി: വിൽപ്പനയ്ക്കായി 12 കുപ്പി വിദേശമദ്യം കൈവശം വെച്ചെന്ന കേസിൽ കുവൈത്ത് സ്വദേശിയെ മിസ്ഡിമീനർ കോടതി കുറ്റവിമുക്തനാക്കി. വ്യക്തമായ നിയമപരമായ തെളിവുകൾ ഇല്ലാതെ ഒരാളെ കുറ്റക്കാരനാക്കാനോ ശിക്ഷിക്കാനോ കഴിയില്ലെന്ന തത്വം ചൂണ്ടിക്കാട്ടിയാണ് കോടതിയുടെ വിധി.
പിടിച്ചെടുത്ത മദ്യം വിൽപ്പനയ്ക്കായി സൂക്ഷിച്ചതാണെന്ന് തെളിയിക്കാൻ പ്രോസിക്യൂഷന് സാധിച്ചില്ലെന്ന് കോടതി വ്യക്തമാക്കി. ഇത് സ്വന്തം ഉപയോഗത്തിനായി കൈവശം വെച്ചതാണെന്ന പ്രതിയുടെ വാദമാണ് അംഗീകരിച്ചത്.
പ്രതി മദ്യം വിൽക്കാൻ ശ്രമിച്ചതായോ മറ്റുള്ളവർക്ക് കൈമാറിയതായോ തെളിയിക്കുന്ന യാതൊരു അന്തിമ തെളിവുകളും കേസ് രേഖകളിൽ ഇല്ലെന്നും കോടതി നിരീക്ഷിച്ചു. പിടിച്ചെടുത്ത മദ്യം പ്രതി വിറ്റതായി ആരും കണ്ടിട്ടില്ലെന്നും സാക്ഷിമൊഴികളിൽ പോലും ഇതുസംബന്ധിച്ച സ്ഥിരീകരണമില്ലെന്നും വിധിയിൽ പറയുന്നു.
പ്രതിയുടെ മൊഴി അന്വേഷണ ഘട്ടത്തിലും കോടതിയിലും ഒരേ നിലയിൽ തുടരുകയായിരുന്നുവെന്നും മദ്യം വിൽപ്പന ലക്ഷ്യത്തോടെ കൈവശം വെച്ചിട്ടില്ലെന്ന് അദ്ദേഹം ആവർത്തിച്ച് വ്യക്തമാക്കിയതായും കോടതി ചൂണ്ടിക്കാട്ടി.
സംശയങ്ങളുടെയോ അനുമാനങ്ങളുടെയോ അടിസ്ഥാനത്തിൽ ക്രിമിനൽ കേസുകളിൽ ശിക്ഷ വിധിക്കാനാവില്ലെന്ന് കോടതി ഓർമ്മിപ്പിച്ചു. ശിക്ഷ വിധികൾ വ്യക്തമായ തെളിവുകളും ഉറച്ച ബോധ്യവും അടിസ്ഥാനമാക്കിയിരിക്കണമെന്ന നിയമതത്വം വിധിയിൽ വീണ്ടും സ്ഥിരീകരിക്കപ്പെട്ടു.
