കാസർഗോഡ്: കേരളത്തിലെ ഒന്നാമത്തെ നിയോജക മണ്ഡലമായ മഞ്ചേശ്വരത്ത് ഇടതുമുന്നണിക്ക് കനത്ത പ്രഹരമേൽപ്പിച്ചുകൊണ്ട് സ്ഥാനാർത്ഥിക്ക് കെട്ടിവെച്ച തുക നഷ്ടമായി. സംസ്ഥാനത്തുടനീളം ഇടതുപക്ഷത്തിന് നിർണ്ണായക സ്വാധീനമുണ്ടായിട്ടും അരിവാൾ ചുറ്റിക നക്ഷത്രത്തിൽ മത്സരിച്ച ഒരു സ്ഥാനാർത്ഥിക്ക് ഇത്തരമൊരു തിരിച്ചടി നേരിടേണ്ടി വന്നത് മഞ്ചേശ്വരത്ത് മാത്രമാണ് എന്നത് രാഷ്ട്രീയ കേന്ദ്രങ്ങളെ ഞെട്ടിച്ചിരിക്കുകയാണ്. നിയമസഭാ തിരഞ്ഞെടുപ്പ് ചട്ടപ്രകാരം സാധുവായ വോട്ടിന്റെ ആറിലൊന്ന് അതായത് 16.7 ശതമാനം വോട്ടുകൾ ലഭിച്ചാൽ മാത്രമേ സ്ഥാനാർത്ഥി കെട്ടിവെക്കുന്ന 10,000 രൂപ തിരികെ ലഭിക്കുകയുള്ളൂ. മഞ്ചേശ്വരത്ത് ഇത്തവണ പോൾ ചെയ്ത 1,87,801 സാധുവായ വോട്ടുകളിൽ സിപിഎം സ്ഥാനാർത്ഥി കെ.ആർ. ജയാനന്ദയ്ക്ക് ലഭിച്ചത് വെറും 21,212 വോട്ടുകൾ മാത്രമാണ്. അതായത് ആകെ വോട്ടിന്റെ 11.29 ശതമാനം മാത്രം. തുക തിരികെ ലഭിക്കാൻ വേണ്ട 31,300 വോട്ടുകൾ എന്ന കടമ്പ കടക്കാൻ ജയാനന്ദയ്ക്ക് സാധിച്ചില്ല. 2021-ലെ തിരഞ്ഞെടുപ്പിൽ വി.വി. രമേശൻ ഇതേ മണ്ഡലത്തിൽ 40,639 വോട്ടുകൾ നേടിയിരുന്ന സ്ഥാനത്താണ് ഇത്തവണ ഇടതുപക്ഷത്തിന് ഈ വൻ പതനം നേരിടേണ്ടി വന്നത്.
ഇടതുമുന്നണിയെ സംബന്ധിച്ചിടത്തോളം അരിവാൾ ചുറ്റിക നക്ഷത്രത്തിൽ മത്സരിച്ച് കെട്ടിവെച്ച തുക നഷ്ടമാകുന്നത് അത്യപൂർവ്വമായ സംഭവമാണ്. മുൻപ് 2011-ലും 2016-ലും കാസർകോട് മണ്ഡലത്തിൽ ഐഎൻഎൽ സ്ഥാനാർത്ഥികൾക്ക് തുക നഷ്ടമായിട്ടുണ്ടെങ്കിലും അന്ന് അവർ സ്വന്തം ചിഹ്നത്തിലല്ല മത്സരിച്ചിരുന്നത്. 2016-ൽ തിരുവനന്തപുരം നേമത്ത് ഒ. രാജഗോപാൽ വിജയിച്ചപ്പോൾ മൂന്നാം സ്ഥാനത്തേക്ക് പിന്തള്ളപ്പെട്ട യുഡിഎഫ് സ്ഥാനാർത്ഥി സുരേന്ദ്രൻ പിള്ളയ്ക്കും ഇത്തരത്തിൽ തുക നഷ്ടമായ ചരിത്രമുണ്ട്. എന്നാൽ ഒരു പ്രമുഖ കമ്യൂണിസ്റ്റ് പാർട്ടി സ്ഥാനാർത്ഥിക്ക് മഞ്ചേശ്വരത്ത് ഇത്തവണ നേരിട്ടത് ചരിത്രപരമായ പരാജയമാണ്. മണ്ഡലത്തിലെ സിറ്റിങ് എംഎൽഎ എ.കെ.എം. അഷ്റഫ് 96,948 വോട്ടുകൾ നേടി 51.62 ശതമാനം വോട്ടുകളോടെ മണ്ഡലം നിലനിർത്തിയപ്പോൾ ബിജെപി സ്ഥാനാർത്ഥി കെ. സുരേന്ദ്രൻ 67,696 വോട്ടുകൾ (36 ശതമാനം) നേടി രണ്ടാം സ്ഥാനത്തെത്തി. അഷ്റഫിന്റെ ഭൂരിപക്ഷം 29,252 വോട്ടുകളായി ഉയരുകയും ചെയ്തു.
മഞ്ചേശ്വരത്തെ ഈ ഫലം വ്യക്തമാക്കുന്നത് ഇടതുപക്ഷ വോട്ടുകൾ വലിയ തോതിൽ യുഡിഎഫ് സ്ഥാനാർത്ഥിയിലേക്ക് മറിഞ്ഞു എന്നതാണ്. സിപിഎമ്മിലെ സ്ഥാനാർത്ഥി നിർണ്ണയത്തിലുണ്ടായ പാളിച്ചകളാണ് ഈ തിരിച്ചടിക്ക് പ്രധാന കാരണമെന്നാണ് വിലയിരുത്തപ്പെടുന്നത്. തിരഞ്ഞെടുപ്പിന്റെ തുടക്കത്തിൽ ഒരു മുസ്ലിം വിഭാഗത്തിൽപ്പെട്ട സ്വതന്ത്ര സ്ഥാനാർത്ഥിയെ നിർത്താനായിരുന്നു പാർട്ടി ആദ്യം ആലോചിച്ചിരുന്നത്. എന്നാൽ അത്തരമൊരു നീക്കം ബിജെപിയെ സഹായിക്കുമെന്ന വിമർശനം ഉയർന്നതോടെയാണ് പാർട്ടി ചിഹ്നത്തിൽ തന്നെ സ്ഥാനാർത്ഥിയെ നിർത്താൻ തീരുമാനിച്ചത്. എന്നാൽ ഫലം പുറത്തുവന്നപ്പോൾ ബിജെപിയുടെ മുന്നേറ്റം തടയാൻ വോട്ടർമാർ യുഡിഎഫിനെ കൂട്ടത്തോടെ അഭയം പ്രാപിച്ചതാണ് ഇടതുപക്ഷത്തിന്റെ വോട്ട് വിഹിതം ഇത്രയേറെ താഴാൻ കാരണമായത്. മഞ്ചേശ്വരത്തെ ഈ കനത്ത പരാജയം വരും ദിവസങ്ങളിൽ സിപിഎമ്മിനുള്ളിൽ വലിയ ചർച്ചകൾക്കും ആത്മപരിശോധനകൾക്കും വഴിമരുന്നിടുമെന്നുറപ്പാണ്.
