തിരുവനന്തപുരം: മണിയാർ ജലവൈദ്യുത പദ്ധതി കെഎസ്ഇബി ഏറ്റെടുക്കാനുള്ള നടപടി താൽക്കാലികമായി നിർത്തിവെച്ചു. ചീഫ് സെക്രട്ടറിയാണ് ഇത് സംബന്ധിച്ച് നിർദേശം നൽകിയത്. കാലാവധി കഴിഞ്ഞതിനെ തുടർന്ന് പദ്ധതി ഏറ്റെടുക്കാൻ കെഎസ്ഇബി നേരത്തെ ഉത്തരവിറക്കിയിരുന്നു. ഇതിനിടെ പദ്ധതി പ്രദേശത്ത് എത്തിയ കെഎസ്ഇബി ഉദ്യോഗസ്ഥരെ കാർബൊറാണ്ടം കമ്പനി ഉദ്യോഗസ്ഥർ തടഞ്ഞ സംഭവവും ഉണ്ടായി. തുടർന്ന് പൊലീസ് സംരക്ഷണത്തോടെ ഏറ്റെടുക്കൽ നടപടികൾക്ക് ഒരുങ്ങിയിരിക്കെയാണ് പുതിയ നിർദേശം വന്നത്.
പദ്ധതി ഏറ്റെടുക്കൽ സംബന്ധിച്ച് പഠനം നടത്തുന്ന ഉപസമിതി റിപ്പോർട്ട് വരുന്നതിന് മുൻപ് നടപടികൾ സ്വീകരിക്കരുതെന്നാണ് വ്യവസായ വകുപ്പിന്റെ നിർദേശം. മന്ത്രിസഭാ യോഗത്തിൽ വ്യവസായ മന്ത്രി പി. രാജീവ് കെഎസ്ഇബി നടപടിയെ വിമർശിച്ചതിന് പിന്നാലെയാണ് തീരുമാനം. അതേസമയം, കെഎസ്ഇബി തീരുമാനം ചോദ്യം ചെയ്ത് ബന്ധപ്പെട്ട കമ്പനി ഹൈക്കോടതിയെ സമീപിച്ചിരിക്കുകയാണ്.
