കോട്ടയം: മാസപ്പടി വിവാദത്തിൽ കോട്ടയം ഡെപ്യൂട്ടി എക്സൈസ് കമ്മീഷണർ അശോക് കുമാറിനെ സസ്പെൻഡ് ചെയ്തു. എക്സൈസ് കമ്മീഷണർ സസ്പെൻഷൻ ഉത്തരവ് പുറത്തിറക്കി. അശോക് കുമാറിന് പുറമെ ആറ് ഉദ്യോഗസ്ഥർക്കും സസ്പെൻഷൻ ലഭിച്ചു. ചങ്ങനാശ്ശേരി റേഞ്ചിലെയും സർക്കിളിലെയും ഉദ്യോഗസ്ഥരും കോട്ടയം ആന്റി നാർക്കോട്ടിക് സ്ക്വാഡിലെ ഉദ്യോഗസ്ഥരുമാണ് നടപടി നേരിട്ടത്.
ബാറുകളിലെ പരിശോധനയ്ക്കായി എക്സൈസ് കമ്മീഷണർ ജില്ലയിൽ എത്തിയപ്പോഴാണ് ഡെപ്യൂട്ടി കമ്മീഷണറുടെ അനധികൃത ഇടപാടുകൾ സംബന്ധിച്ച വിവരങ്ങൾ ലഭിച്ചത്. ബാറുകളിൽ നിന്ന് ഡെപ്യൂട്ടി കമ്മീഷണർ മാസപ്പടി പിരിച്ചിരുന്നതായും ഇതിനായി ഒരു ബാർ മാനേജരെ ചുമതലപ്പെടുത്തിയിരുന്നതായും അന്വേഷണത്തിൽ കണ്ടെത്തി.
കോട്ടയത്തെ വിവിധ ബാറുകളിൽ നിന്ന് പണം, മദ്യം, മറ്റ് ആനുകൂല്യങ്ങൾ എന്നിവ സ്ഥിരമായി ശേഖരിക്കുന്ന സംവിധാനം നിലനിന്നിരുന്നതായും റിപ്പോർട്ടുണ്ട്. ലൈസൻസ് പുതുക്കൽ, ഓണം, ക്രിസ്മസ് തുടങ്ങിയ അവസരങ്ങളിൽ ബാറുകളിൽ നിന്ന് പണം പിരിച്ചിരുന്നതായി ന്യൂയോർക്ക് സ്ക്വയർ ബാർ ഉടമ മൊഴി നൽകിയതായാണ് വിവരം.
അശോക് കുമാറിനെതിരായ സസ്പെൻഷൻ ഉത്തരവിൽ ഗുരുതര ആരോപണങ്ങളാണ് ഉൾപ്പെടുത്തിയിരിക്കുന്നത്. ന്യൂയോർക്ക് സ്ക്വയർ ബാറിൽ നിന്ന് 15,000 രൂപ ഏജന്റിന് കൈമാറാൻ അശോക് കുമാർ നിർദേശിച്ചതായാണ് ആരോപണം. വിവിധ ബാറുകളിൽ നിന്നായി ആകെ 55,000 രൂപ വാങ്ങിയതായും ബാർ ഉടമ മൊഴി നൽകിയിട്ടുണ്ട്.
അന്വേഷണത്തിനിടെ അശോക് കുമാറിന്റെ മൊബൈൽ ഫോണിലെ വിവരങ്ങൾ ഡിലീറ്റ് ചെയ്തതായും കണ്ടെത്തിയതായി റിപ്പോർട്ടുണ്ട്. മിന്നൽ പരിശോധനയ്ക്കിടെ ചോദ്യം ചെയ്യുന്നതിനിടെയാണ് ബാർ മാനേജരുടെ ഫോണിലേക്ക് ഡെപ്യൂട്ടി കമ്മീഷണറുടെ കോൾ വന്നത്. എക്സൈസ് കമ്മീഷണർ ജില്ലയിലുണ്ടെന്നും ജാഗ്രത പാലിക്കണമെന്നും അശോക് കുമാർ നിർദേശിച്ചതായാണ് വിവരം.
ഈ ഫോൺ സംഭാഷണം ഉൾപ്പെടെയുള്ള തെളിവുകൾ എക്സൈസ് കമ്മീഷണർ ശേഖരിച്ചതായും തുടർന്ന് ബാർ മാനേജരുടെ മൊഴി രേഖപ്പെടുത്തി അശോക് കുമാറിന്റെ വീട്ടിൽ പരിശോധന നടത്തിയതായും റിപ്പോർട്ടുണ്ട്. സംഭവത്തിൽ വകുപ്പുതല അന്വേഷണം തുടരുകയാണ്.
