കോട്ടയം: പാചകവാതക സിലിണ്ടര് പൊട്ടിത്തെറിച്ചുണ്ടായ അപകടത്തിൽ മകന് നഷ്ടപ്പെട്ട അമ്മയ്ക്ക് 12,40,976 രൂപ നഷ്ടപരിഹാരം വിധിച്ച് കോട്ടയം ഉപഭോക്തൃ തര്ക്കപരിഹാര കമ്മീഷന്. നടപടിക്രമങ്ങളുടെ ചെലവായി പതിനായിരം രൂപയും നല്കണം. പാലാ രാമപുരം സ്വദേശിനി കുസുമം എബി നല്കിയ പരാതിയിലാണ് കമ്മീഷന് നടപടി.
2020 നവംബര് 18 നാണ് കേസിനാസ്പദമായ സംഭവം. ഗ്യാസ് സിലണ്ടര് റെഗുലേറ്ററില് കണക്ട് ചെയ്യാന് ശ്രമിക്കവേ ഗ്യാസ് ചോരുകയായിരുന്നു. ഉടന് തന്നെ പരാതിക്കാരി മകനായ സെബിന് അബ്രഹാമിനെ വിളിച്ച് ഗ്യാസ് ചോര്ച്ച നിര്ത്തുവാന് ശ്രമിച്ചെങ്കിലും തീ ആളിപിടിക്കുകയായിരുന്നു.
ഇരുവര്ക്കും ദേഹമാസകലം പൊള്ളലേല്ക്കുകയും തുടർന്ന് ഇരുവരെയും പാലായിലെ സ്വകാര്യ ആശുപത്രിയില് പ്രവേശിപ്പിക്കുകയും ചെയ്തു. ഗുരുതരമായി പൊള്ളലേറ്റ സിബിന് അബ്രഹാം മരണപ്പെട്ടു. സൗത്ത് ഇന്ത്യന് ബാങ്കിലെ ക്ലര്ക്കായിരുന്നു 30 വയസുകാരനായ സെബിന്. കുസുമത്തിന് 50 ശതമാനത്തിലധികം പൊള്ളലേറ്റിരുന്നു.
ഭാരത് പെട്രോളിയം കോർപ്പറേഷന്റെ അശ്രദ്ധ മൂലമുണ്ടായ ശാരീരികവും മാനസികവും സാമ്പത്തികവുമായ ബുദ്ധിമുട്ടുകള്ക്ക് എതിര്കക്ഷികളില് നിന്നും നഷ്ടപരിഹാരം ഈടാക്കണം എന്ന് ആവശ്യപ്പെട്ടുകൊണ്ടാണ് പരാതിക്കാരി കോട്ടയം ഉപഭോക്തൃ തര്ക്ക പരിഹാര കമ്മീഷനെ സമീപിച്ചത്. ഫോറന്സിക് വിദ്ധര് നടത്തിയ പരിശോധനയില് ഗ്യാസ് സിലിണ്ടറിന്റെ തകരാര് മൂലമാണ് ഗ്യാസ് ചോർന്നതെന്ന് കണ്ടെത്തി. തീപിടിത്തതിന് കാരണം ഷോര്ട്ട് സര്ക്യൂട്ടല്ലെന്ന് ഡെപ്യൂട്ടി ഇലക്ട്രിക്കല് ഇന്സ്പെക്ടര് നടത്തിയ പരിശോധനയിലും വ്യക്തമായി. സെല്ഫ് ക്ലോസിംഗ് (എസ്.സി) വാല്വിലെ റിങ് നഷ്ടപ്പെട്ടതായും വലിയ തോതില് വാല്വ് ചോര്ച്ച സംഭവിച്ചതായും രാമപുരം പോലീസിന്റെ അന്വേക്ഷണ റിപ്പോർട്ടിൽ പറയുന്നു. തുടർന്നാണ് യുവതിക്ക് അനുകൂലമായി തർക്ക പരിഹാര കമ്മീഷൻ വിധിച്ചത്.
