കൊച്ചി: മുനമ്പം ഭൂമി വഖഫ് സ്വത്തായി പ്രഖ്യാപിച്ചതുമായി ബന്ധപ്പെട്ട നടപടിക്രമങ്ങളെക്കുറിച്ച് ഉയർന്ന ചോദ്യങ്ങൾക്ക് കേരള സ്റ്റേറ്റ് വഖഫ് ബോർഡ് മറുപടി നൽകണമെന്ന് ഹൈക്കോടതി. കോഴിക്കോട് വഖഫ് ട്രൈബ്യൂണലിന്റെ ഉത്തരവിനെതിരെ വഖഫ് ബോർഡ് നൽകിയ നാല് അപ്പീലുകളും ഹൈക്കോടതി തള്ളി. വിധിയുടെ പകർപ്പ് ലഭിച്ച തീയതി മുതൽ ഒരുമാസത്തിനകം എഴുത്തുപരമായ ചോദ്യങ്ങൾക്ക് മറുപടി നൽകണമെന്നും കോടതി നിർദേശിച്ചു.
2019 മേയ് 20ന് വഖഫ് ബോർഡ് പുറപ്പെടുവിച്ച ഉത്തരവിനെ ചോദ്യം ചെയ്ത് ബന്ധപ്പെട്ട കക്ഷികൾ കോഴിക്കോട് വഖഫ് ട്രൈബ്യൂണലിൽ നൽകിയ ഹർജികളിലാണ് ബോർഡിനോട് എഴുത്തുപരമായി വിശദീകരണം തേടിയത്. ഭൂമി വഖഫ് സ്വത്തായി പ്രഖ്യാപിക്കുന്നതിന് മുമ്പ് നിയമത്തിൽ നിർദേശിച്ച നടപടിക്രമങ്ങൾ പാലിച്ചിരുന്നോ എന്നതിലാണ് പ്രധാനമായും ചോദ്യങ്ങൾ ഉയർന്നത്.
1995ലെ വഖഫ് നിയമത്തിലെ ബന്ധപ്പെട്ട വ്യവസ്ഥകൾ പ്രകാരമുള്ള നടപടികൾ സ്വീകരിച്ചിരുന്നോ, വഖഫ് സ്വത്തുക്കളുടെ സർവേയും പട്ടിക തയ്യാറാക്കലും നടത്തിയിരുന്നോ, പട്ടിക ഔദ്യോഗിക ഗസറ്റിൽ പ്രസിദ്ധീകരിച്ചിരുന്നോ തുടങ്ങിയ കാര്യങ്ങളിലാണ് വിശദീകരണം തേടിയത്.
2019ലെ ഉത്തരവിന് മുമ്പ് നിയമപരമായ നിർബന്ധിത നടപടിക്രമങ്ങൾ പാലിച്ചതിന്റെ രേഖകൾ ലഭ്യമല്ലെന്നാണ് ഹർജിക്കാരുടെ വാദം. ഈ വിഷയങ്ങളിൽ വ്യക്തത വരുത്തുന്നതിനായാണ് ട്രൈബ്യൂണൽ വഖഫ് ബോർഡിനോട് എഴുത്തുപരമായ മറുപടി നൽകാൻ നിർദേശിച്ചത്.
ട്രൈബ്യൂണലിന്റെ ഉത്തരവിനെ ചോദ്യം ചെയ്ത് വഖഫ് ബോർഡ് ഹൈക്കോടതിയെ സമീപിച്ചിരുന്നു. സിവിൽ പ്രൊസീജ്യർ കോഡിലെ Order XI Rule 1 പ്രകാരമുള്ള എഴുത്തുപരമായ ചോദ്യങ്ങൾ സിവിൽ സ്യൂട്ടുകൾക്ക് മാത്രമാണ് ബാധകമെന്നും വഖഫ് ട്രൈബ്യൂണലിലെ Original Application-ൽ ഇത് പ്രയോഗിക്കാനാകില്ലെന്നുമായിരുന്നു ബോർഡിന്റെ വാദം.
എന്നാൽ ഈ വാദം ഹൈക്കോടതി അംഗീകരിച്ചില്ല. വഖഫ് നിയമത്തിലെ സെക്ഷൻ 83(5) പ്രകാരം വഖഫ് ട്രൈബ്യൂണലിന് സിവിൽ കോടതിയുടെ അധികാരങ്ങളുണ്ടെന്ന് കോടതി ചൂണ്ടിക്കാട്ടി. തർക്കവിഷയങ്ങൾ വ്യക്തമാക്കുന്നതിനും വിചാരണ നീളുന്നത് ഒഴിവാക്കുന്നതിനുമായി ആവശ്യമായ വിവരങ്ങൾ നേരത്തെ തന്നെ തേടുന്നത് നിയമപരമാണെന്നും കോടതി വ്യക്തമാക്കി.
ഹർജിക്കാർ ഉന്നയിച്ച ചോദ്യങ്ങൾ കേസിലെ വിഷയങ്ങളുമായി നേരിട്ട് ബന്ധപ്പെട്ടതാണെന്നും അവ അനാവശ്യമോ ഉപദ്രവകരമോ അല്ലെന്നും കോടതി വിലയിരുത്തി. അതിനാൽ ചോദ്യങ്ങൾക്ക് മറുപടി നൽകാൻ വഖഫ് ബോർഡിനോട് നിർദേശിച്ച ട്രൈബ്യൂണൽ ഉത്തരവിൽ ഇടപെടേണ്ട സാഹചര്യമില്ലെന്നും ഡിവിഷൻ ബെഞ്ച് വ്യക്തമാക്കി.
അതേസമയം, 2019ലെ വഖഫ് ബോർഡ് ഉത്തരവ് നിയമവിരുദ്ധമാണെന്ന് ഹൈക്കോടതി ഈ വിധിയിൽ പ്രഖ്യാപിച്ചിട്ടില്ല. ഭൂമി വഖഫ് സ്വത്തായി പ്രഖ്യാപിച്ചതുമായി ബന്ധപ്പെട്ട തർക്കം കോഴിക്കോട് വഖഫ് ട്രൈബ്യൂണലിൽ തുടരും.
നിയമപ്രകാരമുള്ള നടപടിക്രമങ്ങൾ പാലിച്ചിരുന്നോ എന്നത് വ്യക്തമാക്കുന്നതിനായി ഹർജിക്കാർ ഉന്നയിച്ച ചോദ്യങ്ങൾക്ക് വഖഫ് ബോർഡ് മറുപടി നൽകണമെന്ന ട്രൈബ്യൂണലിന്റെ നിർദേശമാണ് ഹൈക്കോടതി ശരിവെച്ചത്.
ജസ്റ്റിസുമാരായ അനിൽ കെ. നരേന്ദ്രനും മുരളീകൃഷ്ണ എസ്.യും ഉൾപ്പെട്ട ഡിവിഷൻ ബെഞ്ചാണ് വഖഫ് ബോർഡിന്റെ നാല് അപ്പീലുകൾ തള്ളിയത്.
