തിരുവനന്തപുരം: വി.ഡി. സതീശന്റെ സോഷ്യൽ മീഡിയ കോർഡിനേറ്ററും പെരുമ്പാവൂരിലെ കോൺഗ്രസ് നേതാവും അറസ്റ്റിലായതോടെ ‘തൂഫാൻ ഒതുങ്ങിയെന്ന്’ സി.പി.എം സംസ്ഥാന സെക്രട്ടറി എം.വി. ഗോവിന്ദൻ. കാസർഗോഡ് ലഹരിക്കേസിലെ പ്രതിക്ക് മുഖ്യമന്ത്രിയുടെ ഓഫീസുമായി അടുത്ത ബന്ധമുണ്ടായിരുന്നുവെന്ന ആരോപണവും അദ്ദേഹം ഉന്നയിച്ചു.
അറസ്റ്റിന് തൊട്ടുമുമ്പ് വരെ പ്രതിക്ക് മുഖ്യമന്ത്രിയുടെ ഓഫീസുമായി ബന്ധമുണ്ടായിരുന്നുവെന്നാണ് ഗോവിന്ദന്റെ ആരോപണം. രാജ്യാന്തര ബന്ധമുള്ള ലഹരിക്കേസായിട്ടും പൊലീസ് കസ്റ്റഡി അപേക്ഷ നൽകാത്തത് ഗൗരവമുള്ള വിഷയമാണെന്നും അദ്ദേഹം പറഞ്ഞു. സ്വന്തക്കാരെ തൊട്ടാൽ ഏത് ‘തൂഫാനും’ കെട്ടടങ്ങുമെന്നും ഗോവിന്ദൻ പരിഹസിച്ചു.
മുൻ മന്ത്രി പി.എ. മുഹമ്മദ് റിയാസുമായി ബന്ധമുള്ളവരുടെ വീടുകളിൽ ഇഡി നടത്തിയ പരിശോധനകൾ പുകമറ സൃഷ്ടിക്കാനുള്ള ശ്രമമാണെന്നും ഗോവിന്ദൻ ആരോപിച്ചു. പരിശോധനകൾക്ക് പിന്നിൽ രാഷ്ട്രീയ ലക്ഷ്യമുണ്ടെന്നും സി.പി.എം നേതാക്കളെ സംശയത്തിന്റെ നിഴലിൽ നിർത്താനാണ് ശ്രമമെന്നും അദ്ദേഹം പറഞ്ഞു. ഇതിനെ രാഷ്ട്രീയമായി നേരിടുമെന്നും ഗോവിന്ദൻ വ്യക്തമാക്കി.
അതേസമയം, ഓണക്കാലത്ത് സംസ്ഥാനത്ത് വലിയ വിലക്കയറ്റമാണെന്നും ഗോവിന്ദൻ ആരോപിച്ചു. വിപണിയിൽ സർക്കാർ കാര്യക്ഷമമായി ഇടപെടുന്നില്ലെന്നും ഇതോടെ കുടുംബങ്ങളുടെ ബജറ്റ് താളം തെറ്റുകയാണെന്നും അദ്ദേഹം പറഞ്ഞു. മുൻ എൽഡിഎഫ് സർക്കാർ വിലക്കയറ്റം നിയന്ത്രിക്കാൻ കാര്യക്ഷമമായി ഇടപെട്ടിരുന്നു. ഇപ്പോൾ വില നിയന്ത്രിക്കുന്നതിൽ സർക്കാർ പരാജയപ്പെട്ടുവെന്നും എം.വി. ഗോവിന്ദൻ കുറ്റപ്പെടുത്തി.
