കണ്ണൂർ: ദേശീയപാത നിർമ്മാണത്തിനിടെയുണ്ടാകുന്ന മണ്ണിടിച്ചിലും മറ്റ് അപകടങ്ങളും ഒഴിവാക്കാൻ നിർമ്മാണ മേഖലയിലെ മണ്ണിന്റെ ഘടനയെക്കുറിച്ച് വിശദമായ പഠനം നടത്തണമെന്ന് കെ.വി. സുമേഷ് എം.എൽ.എ ആവശ്യപ്പെട്ടു. ജില്ലാ വികസന സമിതി യോഗത്തിലാണ് അദ്ദേഹം ഇക്കാര്യം ഉന്നയിച്ചത്.
കോട്ടക്കുന്ന് ഭാഗത്ത് മണ്ണിന്റെ സവിശേഷതകൾ കാരണം റോഡ് താഴുന്നതും എംബാങ്ക്മെന്റ് ഇടിയുന്നതും പ്രദേശവാസികളിൽ വലിയ ഭീതിയുണ്ടാക്കുന്നുണ്ട്. ഇത് പരിഹരിക്കാൻ ദേശീയപാത അധികൃതർ അടിയന്തരമായി ഇടപെടണമെന്നും എം.എൽ.എ പറഞ്ഞു. നിലവിൽ ചതുപ്പ് പ്രദേശത്ത് സംരക്ഷണഭിത്തി കെട്ടി മണ്ണിട്ടുയർത്തിയാണ് വയഡക്റ്റ് നിർമ്മിക്കുന്നത്.നിർമ്മാണത്തിൽ മാറ്റം വേണംനിലവിലെ നിർമ്മാണ രീതി അപകടസാധ്യത വർദ്ധിപ്പിക്കുന്നതിനാൽ, വയഡക്റ്റ് നിർമ്മാണം ആരംഭിച്ചിട്ടുള്ള സ്ഥലത്തുനിന്ന് രണ്ടോ മൂന്നോ സ്പിൻ പുറകോട്ട് മാറ്റി നിർമ്മിക്കണം.
ഇത്തരത്തിൽ മാറ്റം വരുത്തുന്നത് റോഡിന്റെ ഇരുവശങ്ങളിലുമുള്ള ജനങ്ങളുടെ സഞ്ചാരത്തിന് ഏറെ പ്രയോജനകരമാകുമെന്നും അദ്ദേഹം കൂട്ടിച്ചേർത്തു.
