ചെന്നൈ: ദേശീയപാതകളിലെ ടോൾ പിരിവ് കൂടുതൽ വേഗത്തിലും സുഗമവുമാക്കാൻ പുതിയ സംവിധാനവുമായി ദേശീയപാത അതോറിറ്റി ഓഫ് ഇന്ത്യ (NHAI). തമിഴ്നാട്ടിൽ ആദ്യമായി മൾട്ടി-ലെയ്ൻ ഫ്രീ ഫ്ലോ ടോളിങ് സംവിധാനം പ്രവർത്തനം ആരംഭിച്ചു. എൻഎച്ച്-179ബിയിലെ താംബരം-തിണ്ടിവനം പാതയിലെ പരനൂർ ടോൾ പ്ലാസയിലാണ് സംവിധാനം നടപ്പിലാക്കിയത്.
പുതിയ സംവിധാനത്തിലൂടെ ടോൾ നൽകുന്നതിനായി വാഹനങ്ങൾ ടോൾ പ്ലാസയിൽ നിർത്തേണ്ടിവരില്ല. വാഹനങ്ങൾ സ്വന്തം ലെയ്നിലൂടെ തുടരുന്നതിനിടെ ടോൾ പിരിവ് സ്വമേധയാ പൂർത്തിയാകും. ഓട്ടോമാറ്റിക് നമ്പർ പ്ലേറ്റ് റെക്കഗ്നിഷൻ (ANPR) ക്യാമറകളും ഫാസ്ടാഗുമാണ് ഇതിനായി ഉപയോഗിക്കുന്നത്.
ക്യാമറകൾ വാഹനത്തിന്റെ രജിസ്ട്രേഷൻ നമ്പർ തിരിച്ചറിയുകയും ഫാസ്ടാഗ് വഴി ടോൾ തുക വാഹന ഉടമയുടെ അക്കൗണ്ടിൽ നിന്ന് സ്വമേധയാ ഈടാക്കുകയും ചെയ്യും. ഇതോടെ ടോൾ പ്ലാസകളിലെ വാഹനങ്ങളുടെ നീണ്ട നിരയും കാത്തിരിപ്പും കുറയ്ക്കാൻ സാധിക്കുമെന്നാണ് NHAI വ്യക്തമാക്കുന്നത്.
വാഹനങ്ങൾ നിർത്തി വീണ്ടും മുന്നോട്ട് എടുക്കേണ്ട സാഹചര്യം ഒഴിവാകുന്നതോടെ യാത്രാസമയവും ഇന്ധന ഉപഭോഗവും കുറയ്ക്കാൻ സാധിച്ചേക്കും. ടോൾ പ്ലാസകളിലെ കാത്തിരിപ്പ് കുറയുന്നത് അന്തരീക്ഷ മലിനീകരണം കുറയ്ക്കാനും സഹായിക്കുമെന്നാണ് വിലയിരുത്തൽ.
ടോൾ പിരിവിലെ മനുഷ്യ ഇടപെടൽ കുറയ്ക്കുന്നതിലൂടെ നടപടിക്രമങ്ങൾ കൂടുതൽ സുതാര്യവും കാര്യക്ഷമവുമാക്കാനും പുതിയ സംവിധാനത്തിലൂടെ കഴിയുമെന്ന് NHAI അറിയിച്ചു.
തമിഴ്നാടിന് പുറമെ രാജ്യത്തെ വിവിധ ദേശീയപാതകളിലും മൾട്ടി-ലെയ്ൻ ഫ്രീ ഫ്ലോ സംവിധാനം ഘട്ടംഘട്ടമായി നടപ്പിലാക്കിവരികയാണ്. ഗുജറാത്തിലെ എൻഎച്ച്-48ലെ ചൊര്യാസി ടോൾ പ്ലാസ, ഡൽഹി-എൻസിആറിലെ യുഇആർ-IIലെ മുണ്ട്ക-ബക്കർവാല ടോൾ പ്ലാസ എന്നിവിടങ്ങളിലും സംവിധാനം നിലവിലുണ്ട്.
രാജസ്ഥാനിലെ എൻഎച്ച്-48ലെ ഷാജഹാൻപൂർ, ദൗലത്പുർ, മനോഹർപുർ ടോൾ പ്ലാസകളിലും ഹരിയാനയിലെ എൻഎച്ച്-44ലെ ഘരൗണ്ട ടോൾ പ്ലാസയിലും മൾട്ടി-ലെയ്ൻ ഫ്രീ ഫ്ലോ സംവിധാനം പ്രവർത്തിക്കുന്നുണ്ട്.
പുതിയ സംവിധാനം ഉപയോഗിക്കുന്ന ടോൾ പ്ലാസകളിലൂടെ കടന്നുപോകുന്ന വാഹനങ്ങളിൽ ഫാസ്ടാഗ് സജീവമായിരിക്കണം. അക്കൗണ്ടിൽ ആവശ്യമായ ബാലൻസ് ഉണ്ടെന്നും യാത്രയ്ക്ക് മുമ്പ് ഉറപ്പാക്കണം. ഫാസ്ടാഗ് ഇല്ലാത്തതോ പ്രവർത്തനരഹിതമായതോ ആയ വാഹനങ്ങൾക്ക് ഇലക്ട്രോണിക് അറിയിപ്പ് ലഭിച്ചേക്കും.
രാജ്യത്തെ കൂടുതൽ ദേശീയപാതകളിലേക്ക് സംവിധാനം വ്യാപിപ്പിക്കാനാണ് NHAIയുടെ പദ്ധതി. ടോൾ പ്ലാസകളിലെ കാത്തിരിപ്പ് ഒഴിവാക്കി കൂടുതൽ സുഗമവും വേഗതയേറിയതുമായ ഹൈവേ യാത്ര ഉറപ്പാക്കുകയാണ് ലക്ഷ്യം.
