തെലങ്കാന: ബംഗളൂരുവിൽ ഹോസ്റ്റൽ മുറിയിൽ മരിച്ച നിലയിൽ കണ്ടെത്തിയ ബി.എസ്.സി നഴ്സിങ് വിദ്യാർത്ഥി ആദിത്യന്റെ മരണത്തിൽ കോളേജ് മാനേജ്മെന്റിനെതിരെ ഗുരുതര ആരോപണവുമായി കുടുംബം രംഗത്തെത്തി. ഇത് ആത്മഹത്യയായി ചിത്രീകരിക്കാൻ ശ്രമിക്കുകയാണെന്ന് കുടുംബം ആരോപിക്കുന്നു.
മരണവിവരം അറിഞ്ഞ് ബംഗളൂരുവിലെത്തിയ അച്ഛൻ പ്രദീപിനോട് ഉൾപ്പെടെ, ആദിത്യൻ ആത്മഹത്യ ചെയ്തതാണെന്ന നിലപാടാണ് മാനേജ്മെന്റ് തുടക്കത്തിൽ തന്നെ ഉറപ്പിച്ച് പറഞ്ഞതെന്ന് കുടുംബം ചൂണ്ടിക്കാട്ടുന്നു. ഹെബ്ബഗോഡി പൊലീസ് ആദ്യം പരാതി സ്വീകരിക്കാൻ തയ്യാറാകാതിരുന്നതും സംശയം വർധിപ്പിച്ചതായി അവർ ആരോപിച്ചു. പിന്നീട് അഭിഭാഷകന്റെ ഇടപെടലിനുശേഷമാണ് പരാതി രജിസ്റ്റർ ചെയ്തത്.
സഹപാഠികളുടെ മയക്കുമരുന്ന് ഉപയോഗത്തെക്കുറിച്ച് ആദിത്യൻ മുൻപ് പരാതി നൽകിയിരുന്നുവെന്നും, അതിൽ കോളേജ് മാനേജ്മെന്റ് നടപടി കൈക്കൊണ്ടില്ലെന്നുമാണ് കുടുംബത്തിന്റെ ആരോപണം. മറിച്ച്, ഇയാളെയും മയക്കുമരുന്ന് ഉപയോഗവുമായി ബന്ധിപ്പിച്ചുവെന്ന ആരോപണങ്ങൾ ഉയർന്നപ്പോൾ എന്ത് നടപടി സ്വീകരിച്ചതെന്ന ചോദ്യവും ഉയരുന്നു. ഈ വിഷയത്തിൽ ചില അധ്യാപകരുടെ ഭാഗത്തുനിന്നും ആദിത്യൻ കുറ്റപ്പെടുത്തലുകൾ നേരിട്ടിരുന്നുവെന്നും പറയുന്നു.
ഈ വിവരങ്ങൾ ഉൾപ്പെടുത്തി നൽകിയ പരാതിയിൽ പൊലീസ് ഇതുവരെ കാര്യമായ നടപടികളൊന്നും എടുത്തിട്ടില്ലെന്നും കുടുംബം ആരോപിക്കുന്നു. കോളേജിന് രാഷ്ട്രീയ ബന്ധങ്ങളുണ്ടെന്ന സംശയവും കുടുംബം ഉന്നയിക്കുന്നു. ഇതിനിടെ, ആദിത്യന്റെ ശബ്ദസന്ദേശം പുറത്തുവന്നതും സംഭവത്തിന് കൂടുതൽ ഗൗരവം നൽകുന്നു.
അതേസമയം, എല്ലാ ആരോപണങ്ങളും കോളേജ് മാനേജ്മെന്റ് നിഷേധിച്ചു. ഒറ്റപ്പെട്ടതുമൂലമുള്ള മാനസിക സമ്മർദവും വ്യക്തിപരമായ പ്രശ്നങ്ങളുമാകാം മരണത്തിലേക്ക് നയിച്ചതെന്നതാണ് അവരുടെ വിശദീകരണം. എന്നാൽ ഈ വാദം കുടുംബം തള്ളിക്കളഞ്ഞിട്ടുണ്ട്.
