മസ്കറ്റ്: ഒമാൻ തീരത്ത് അപകടത്തിൽപ്പെട്ട എണ്ണക്കപ്പലിൽ നിന്നുള്ള എണ്ണച്ചോർച്ച കരയിലേക്ക് വ്യാപിക്കാൻ തുടങ്ങിയതായി ഇന്റർനാഷണൽ മാരിടൈം ഓർഗനൈസേഷൻ (IMO) അറിയിച്ചു. ശക്തമായ മൺസൂൺ കാറ്റ് തുടരുന്നതിനാൽ എണ്ണച്ചോർച്ച തടയാനുള്ള രക്ഷാപ്രവർത്തനങ്ങൾ ബുദ്ധിമുട്ടിലായിരിക്കുകയാണ്.

ജൂൺ 30നാണ് ‘കരോലിൻ ബെസെംഗി’ എന്ന ക്രൂഡ് ഓയിൽ ടാങ്കർ ഒമാൻ തീരത്ത് അപകടത്തിൽപ്പെട്ടത്. നിലവിൽ ഷർബിഥാത് തീരത്ത് നിന്ന് 22 നോട്ടിക്കൽ മൈൽ അകലെയാണ് കപ്പലുള്ളത്. കപ്പലിൽ നിന്ന് ചോർന്ന എണ്ണ അൽ-ഖിബ്ലിയ ദ്വീപിന്റെ വടക്കുകിഴക്കൻ ഭാഗത്തേക്ക് ഒഴുകുകയാണ്. എണ്ണ ഇപ്പോൾ ഒമാന്റെ പ്രധാന കരഭാഗങ്ങളിലേക്കും എത്തിത്തുടങ്ങിയതായി ഐഎംഒ വക്താവ് അറിയിച്ചു. ശക്തമായ കാറ്റും കടൽക്ഷോഭവും തുടരുന്നതിനാൽ ചോർച്ച നിയന്ത്രിക്കാനുള്ള നടപടികൾക്ക് വെല്ലുവിളി നേരിടുകയാണ്. രക്ഷാപ്രവർത്തനങ്ങളും എണ്ണ നീക്കം ചെയ്യാനുള്ള നടപടികളും തുടരുകയാണ്.