ന്യൂഡല്ഹി: പഹല്ഗാം ഭീകരാക്രമണത്തില് എന്ഐഎ ഇന്ന് കുറ്റപത്രം സമര്പ്പിക്കും. ജമ്മുവിലെ പ്രത്യേക എന്ഐഎ കോടതിയിലാണ് കുറ്റപത്രം സമര്പ്പിക്കുക.
ഏപ്രില് 22 ലെ ഭീകരാക്രമണത്തില് മൂന്ന് തീവ്രവാദികള്ക്ക് നേരിട്ട് പങ്കുണ്ടെന്ന് എന്ഐഎ അന്വേഷണത്തില് കണ്ടെത്തിയിരുന്നു.
ജൂണില് മൂന്ന് പാകിസ്താന് ഭീകരര്ക്ക് അഭയം നല്കിയതിന് രണ്ട് പേരെ എന്ഐഎ അറസ്റ്റ് ചെയ്തിരുന്നു.
ബട്കോട്ടില് നിന്നുള്ള പര്വൈസ് അഹമ്മദ് ജോത്തറും പഹല്ഗാമില് നിന്നുള്ള ബഷീര് അഹമ്മദ് ജോത്തറും എന്നിവരാണ് അറസ്റ്റിലായത്.
ഭീകരര്ക്ക് ഭക്ഷണം, താമസം, ലോജിസ്റ്റിക്കല് സഹായം എന്നിവ നല്കിയവരാണ് ഇരുവരും എന്ന് എന്ഐഎ ഉദ്യോഗസ്ഥര് പറഞ്ഞിരുന്നു.
ജൂലൈ 28 ന് ശ്രീനഗറില് ‘ഓപ്പറേഷന് മഹാദേവ്’ എന്ന പേരില് നടന്ന ഏറ്റുമുട്ടലില് മൂന്ന് ലഷ്കര് ഇ തൊയ്ബ ഭീകരര് കൊല്ലപ്പെട്ടിരുന്നു.
ഇവര് പഹല്ഗാം ആക്രമണത്തിന് ശേഷം ഡാച്ചിഗാം-ഹര്വാന് വനമേഖലയില് ഒളിച്ചിരിക്കുകയായിരുന്നു.
പഹല്ഗാം ആക്രമണത്തിന് മറുപടിയായി, മെയ് 7 ന് ഇന്ത്യ ‘ഓപ്പറേഷന് സിന്ദൂര്’ എന്ന പേരില് പാകിസ്താനിലെയും പാകിസ്താന് അധിനിവേശ കശ്മീരിലെയും (POK) തീവ്രവാദ ഒളിത്താവളങ്ങളില് ആക്രമണം നടത്തിയിരുന്നു.
