ന്യൂഡൽഹി: മുഖ്യ തിരഞ്ഞെടുപ്പ് കമ്മിഷണർ ഗ്യാനേഷ് കുമാറിന്റെ രാജി ആവശ്യപ്പെട്ടുള്ള പ്രതിഷേധത്തിൽ പ്രക്ഷുബ്ധമായി രാജ്യതലസ്ഥാനം. പ്രതിഷേധത്തിന്റെ ആദ്യഘട്ടത്തിൽ തന്നെ നിരവധി നേതാക്കളെയും പ്രവർത്തകരെയും ഡൽഹി പൊലീസ് കസ്റ്റഡിയിലെടുത്തു.
അഭിജിത് ദീപ്‌കെ, സൗരവ് ദാസ്, അശുതോഷ് റങ്ക തുടങ്ങിയ നേതാക്കളെ കസ്റ്റഡിയിലെടുത്തതോടെ സിജെപിയുടെ പ്രതിഷേധം നടന്നില്ല. എന്നാൽ വിവിധ പ്രതിപക്ഷ പാർട്ടികളും യുവജന സംഘടനകളും നടത്തിയ മാർച്ചുകൾ ഡൽഹിയെ സമരഭരിതമാക്കി. എസ്.എഫ്.ഐ, ഡി.വൈ.എഫ്.ഐ പ്രവർത്തകരും പ്രതിഷേധവുമായി രംഗത്തെത്തി. ഇവരെയും ഡൽഹി പൊലീസ് കസ്റ്റഡിയിലെടുത്തു. അതേസമയം, ആരുടെയും അറസ്റ്റ് രേഖപ്പെടുത്തിയതായി വിവരമില്ല.
ജന്തർ മന്തറിൽ പ്രതിഷേധിക്കാനെത്തിയ സിജെപി നേതാക്കളെ ഡൽഹിയിൽ ഇറങ്ങാൻ അനുവദിക്കാതെ വിമാനത്തിനുള്ളിൽവെച്ചുതന്നെ കസ്റ്റഡിയിലെടുക്കുകയായിരുന്നു പൊലീസിന്റെ നടപടി. ശനിയാഴ്ച രാവിലെ പത്തുമണിക്ക് പ്രതിഷേധം ആരംഭിക്കുമെന്ന് പ്രഖ്യാപിച്ചിരുന്നെങ്കിലും മുംബൈയിൽനിന്ന് ഡൽഹിയിലെ ഇന്ദിരാഗാന്ധി വിമാനത്താവളത്തിലെത്തിയ അഭിജിത് ദീപ്‌കെ, അശുതോഷ് റങ്ക, സൗരവ് ദാസ് എന്നിവരെ വിമാനത്തിനുള്ളിൽവെച്ചുതന്നെ പൊലീസ് കസ്റ്റഡിയിലെടുത്തു.
അഭിജിത് ദീപ്‌കെയെ ഗുരുഗ്രാമിലെ പൊലീസ് സ്റ്റേഷനിലേക്കും സൗരവ് ദാസിനെ ഡൽഹിയിലെ പൊലീസ് സ്റ്റേഷനിലേക്കും അശുതോഷ് റങ്കയെ ദ്വാരകയിലെ പൊലീസ് സ്റ്റേഷനിലേക്കുമാണ് കൊണ്ടുപോയതെന്നാണ് വിവരം.
പ്രതിഷേധത്തിൽ പങ്കെടുക്കാനെത്തിയ കേരളത്തിൽനിന്നുള്ള സി.പി.എം നേതാക്കളെയും ഡൽഹി പൊലീസ് കസ്റ്റഡിയിലെടുത്തു. പ്രതിപക്ഷ നേതാവ് പിണറായി വിജയൻ, സി.പി.എം ജനറൽ സെക്രട്ടറി എം.എ. ബേബി, എം.വി. ഗോവിന്ദൻ, പി.കെ. ശ്രീമതി, ജോൺ ബ്രിട്ടാസ് തുടങ്ങിയവരെയാണ് കസ്റ്റഡിയിലെടുത്തത്.
പ്രതിഷേധത്തെ കർശനമായി നേരിടുന്ന നിലപാടാണ് ഡൽഹി പൊലീസ് സ്വീകരിച്ചത്. സിജെപി നേതാക്കളെ വിമാനത്തിനുള്ളിൽവെച്ച് കസ്റ്റഡിയിലെടുത്തതിന് പിന്നാലെ മറ്റ് പ്രതിഷേധക്കാരെയും ബലപ്രയോഗത്തിലൂടെ നീക്കം ചെയ്തു.
