തിരുവനന്തപുരം: ആസൂത്രണ ബോർഡിലെ പരീക്ഷാ ക്രമക്കേടുമായി ബന്ധപ്പെട്ട് പിഎസ്‌സിക്കെതിരെ ഗുരുതര ആരോപണങ്ങളുമായി ക്രൈംബ്രാഞ്ച്. പരീക്ഷയിൽ പത്ത് ചോദ്യങ്ങളുടെ ഉത്തരങ്ങൾ മൂല്യനിർണയം നടത്താതിരുന്നത് ക്ലറിക്കൽ വീഴ്ചയല്ലെന്നും ബോധപൂർവമായ നടപടിയാണെന്നും ഹൈക്കോടതിയിൽ സമർപ്പിച്ച റിപ്പോർട്ടിൽ ക്രൈംബ്രാഞ്ച് ചൂണ്ടിക്കാട്ടി.
എഫ്‌ഐആർ റദ്ദാക്കണമെന്നാവശ്യപ്പെട്ട് പിഎസ്‌സി കോടതിയെ സമീപിച്ചതിലും ദുരൂഹതയുണ്ടെന്ന് റിപ്പോർട്ടിൽ പറയുന്നു. പിഎസ്‌സി ചെയർമാനും അംഗങ്ങളും ഉൾപ്പെടെയുള്ള പ്രതികളെ സംരക്ഷിക്കാനാണ് നീക്കമെന്ന ആരോപണവും ക്രൈംബ്രാഞ്ച് ഉന്നയിച്ചിട്ടുണ്ട്.
ആസൂത്രണ ബോർഡ് പരീക്ഷയിൽ ഒന്നാം റാങ്ക് നേടിയ അരുൺ ജെ. പ്രതാപൻ പത്ത് ചോദ്യങ്ങൾക്ക് അപൂർണമായ ഉത്തരങ്ങളാണ് നൽകിയതെന്നാണ് ക്രൈംബ്രാഞ്ച് റിപ്പോർട്ടിൽ പറയുന്നത്. ഈ ഉത്തരങ്ങൾ പരിശോധിക്കാതിരുന്നത് ബോധപൂർവമാണെന്ന് സംശയിക്കേണ്ട സാഹചര്യമുണ്ടെന്നും റിപ്പോർട്ട് ചൂണ്ടിക്കാട്ടുന്നു.
ഉത്തരക്കടലാസുകളുടെ പകർപ്പ് നൽകുന്നതിൽ പിഎസ്‌സി വരുത്തിയ കാലതാമസവും സംശയാസ്പദമാണെന്ന് അന്വേഷണസംഘം വ്യക്തമാക്കുന്നു.
ഉത്തരക്കടലാസിനായി അപേക്ഷിച്ച ഉദ്യോഗാർഥിക്ക് മറുപടി നൽകിയത് ഒരു വർഷത്തിന് ശേഷം
ജയലാൽ എന്ന ഉദ്യോഗാർഥി 2025 ജൂൺ 11നാണ് ഉത്തരക്കടലാസിന്റെ പകർപ്പ് ആവശ്യപ്പെട്ട് അപേക്ഷ നൽകിയത്. എന്നാൽ 2026 ജൂൺ 18നാണ് പിഎസ്‌സി മറുപടി നൽകിയതെന്ന് ക്രൈംബ്രാഞ്ച് റിപ്പോർട്ടിൽ പറയുന്നു.
ഈ കാലതാമസം മനഃപൂർവമാണെന്നാണ് അന്വേഷണസംഘത്തിന്റെ വിലയിരുത്തൽ. ഉത്തരക്കടലാസുകളുടെ പകർപ്പ് നൽകുന്നത് വൈകിപ്പിച്ചതിലൂടെ പരാതിക്കാരുടെ നിയമപരമായ അവകാശങ്ങൾ തടസ്സപ്പെടുത്തുകയും ഒന്നാം റാങ്കുകാരനായ അരുൺ ജെ. പ്രതാപനെ സംരക്ഷിക്കുകയും ചെയ്യുകയായിരുന്നു ലക്ഷ്യമെന്നും റിപ്പോർട്ടിൽ ആരോപിക്കുന്നു.
അഡ്വൈസ് മെമ്മോ നൽകിയാൽ ഒരു വർഷത്തിനുള്ളിൽ നിയമനം റദ്ദാക്കുന്നതുമായി ബന്ധപ്പെട്ട അധികാരപരിധി മാത്രമാണ് പിഎസ്‌സിക്കുള്ളതെന്നും ക്രൈംബ്രാഞ്ച് റിപ്പോർട്ടിൽ ചൂണ്ടിക്കാട്ടുന്നു. പരീക്ഷാ രേഖകളുടെ പകർപ്പ് നൽകുന്നതിൽ കാലതാമസം വരുത്തിയതിലൂടെ പരാതിക്കാർക്ക് നിയമനടപടികളുമായി മുന്നോട്ടുപോകാനുള്ള അവസരം പരിമിതപ്പെടുത്തിയെന്ന ആരോപണവും റിപ്പോർട്ടിലുണ്ട്.
ഉത്തരങ്ങൾ മൂല്യനിർണയം നടത്താതിരുന്നത് കേവലം സാങ്കേതിക പിഴവായിരുന്നെങ്കിൽ അപേക്ഷ ലഭിച്ചയുടൻ ഉത്തരക്കടലാസുകളുടെ പകർപ്പ് നൽകാമായിരുന്നുവെന്നും ക്രൈംബ്രാഞ്ച് നിരീക്ഷിക്കുന്നു.
ആസൂത്രണ ബോർഡ് പരീക്ഷയിലെ ക്രമക്കേടുമായി ബന്ധപ്പെട്ട് പിഎസ്‌സിക്കെതിരെ ഉയർന്ന ആരോപണങ്ങൾ കേസിൽ നിർണായകമാകുമെന്നാണ് വിലയിരുത്തൽ. അതേസമയം, റിപ്പോർട്ടിലെ ആരോപണങ്ങൾ കോടതിയുടെ അന്തിമ കണ്ടെത്തലുകളല്ല.
