തിരുവനന്തപുരം: സംസ്ഥാനത്ത് ശക്തമായ മഴ തുടരുന്ന സാഹചര്യത്തിൽ വയനാട് ഉൾപ്പെടെ ആറ് ജില്ലകളിൽ ഓറഞ്ച് അലർട്ട് പ്രഖ്യാപിച്ചു. വയനാട്, കോഴിക്കോട്, മലപ്പുറം, തൃശ്ശൂർ, എറണാകുളം, ഇടുക്കി ജില്ലകളിലാണ് അതിശക്തമായ മഴയ്ക്കുള്ള മുന്നറിയിപ്പ് നൽകിയിരിക്കുന്നത്. തിരുവനന്തപുരം, കൊല്ലം ജില്ലകളൊഴികെ സംസ്ഥാനത്തെ മറ്റ് ജില്ലകളിൽ യെല്ലോ അലർട്ടും നിലവിലുണ്ട്.
വയനാട്ടിൽ രാവിലെ മുതൽ ഒറ്റപ്പെട്ട ശക്തമായ മഴ ലഭിക്കുന്നുണ്ട്. വടക്കൻ കേരളത്തിൽ ഇന്നും നാളെയും മഴ കൂടുതൽ ശക്തമാകുമെന്നാണ് കാലാവസ്ഥാ വകുപ്പ് മുന്നറിയിപ്പ് നൽകുന്നത്. ഓറഞ്ച് അലർട്ട് പ്രഖ്യാപിച്ച ജില്ലകളിൽ 24 മണിക്കൂറിനിടെ 204.4 മില്ലിമീറ്റർ വരെ മഴ ലഭിക്കാൻ സാധ്യതയുള്ളതിനാൽ ജനങ്ങൾ അതീവ ജാഗ്രത പാലിക്കണമെന്ന് അധികൃതർ നിർദേശിച്ചു.
പടിഞ്ഞാറൻ കാറ്റ് ശക്തിപ്പെട്ടതും ന്യൂനമർദ പാത്തിയുടെ സ്വാധീനവും ചേർന്നതാണ് മഴ കനക്കാൻ കാരണമായതെന്ന് കാലാവസ്ഥാ വകുപ്പ് അറിയിച്ചു. ഇതിന്റെ പശ്ചാത്തലത്തിൽ കാസർകോട് മുതൽ മലപ്പുറം വരെയുള്ള വടക്കൻ ജില്ലകളിൽ പ്രത്യേക ജാഗ്രത നിർദേശം നൽകിയിട്ടുണ്ട്.
അതേസമയം, വയനാട്ടിലെ കള്ളാടി–മേപ്പാടി മേഖലയിൽ ഉണ്ടായത് സ്വാഭാവിക മണ്ണിടിച്ചിലല്ലെന്ന് ഇന്ത്യൻ കാലാവസ്ഥാ വകുപ്പ് (ഐഎംഡി) ഡയറക്ടർ നിത കെ. ഗോപാൽ വ്യക്തമാക്കി. ജില്ലയിൽ മുന്നറിയിപ്പ് നൽകുന്നതിൽ വീഴ്ചയുണ്ടായിട്ടില്ലെന്നും യെല്ലോ അലർട്ടിന് സമാനമായ സാഹചര്യമായിരുന്നുവെങ്കിലും ചില പ്രദേശങ്ങളിൽ പ്രതീക്ഷിച്ചതിലും കൂടുതൽ മഴ ലഭിച്ചതായും അവർ പറഞ്ഞു.
മഴ ലഭിച്ചാൽ എല്ലാ സാഹചര്യങ്ങളിലും മണ്ണിടിച്ചിൽ ഉണ്ടാകണമെന്നില്ലെന്നും പ്രദേശത്തിന്റെ ഭൗമശാസ്ത്രപരമായ സാഹചര്യങ്ങളും മറ്റ് ഘടകങ്ങളും നിർണായകമാണെന്നും ഐഎംഡി വ്യക്തമാക്കി. കഴിഞ്ഞ ദിവസം ഏകദേശം 12 സെന്റിമീറ്റർ മഴയാണ് പ്രവചിച്ചിരുന്നതെങ്കിലും ചിലയിടങ്ങളിൽ അതിലേറെ മഴ രേഖപ്പെടുത്തി. വരും ദിവസങ്ങളിലും ശക്തമായ മഴയ്ക്കും കാറ്റിനും സാധ്യതയുള്ളതിനാൽ പ്രത്യേകിച്ച് മലയോര മേഖലകളിൽ താമസിക്കുന്നവർ അതീവ ജാഗ്രത പാലിക്കണമെന്നും അധികൃതർ നിർദേശിച്ചു.
