അയോധ്യ: രാമക്ഷേത്രത്തിലെ സംഭാവനത്തട്ടിപ്പ് കേസിൽ അന്വേഷണം ശക്തിപ്പെടുത്താൻ പ്രത്യേക അന്വേഷണസംഘത്തെ (എസ്.ഐ.ടി.) പുനഃസംഘടിപ്പിച്ച് ഉത്തർപ്രദേശ് സർക്കാർ. സുപ്രീം കോടതിയുടെ നിർദേശത്തെ തുടർന്നാണ് പരിചയസമ്പന്നരായ മുതിർന്ന ഐ.പി.എസ്. ഉദ്യോഗസ്ഥരെ ഉൾപ്പെടുത്തി പുതിയ മൂന്നംഗ സംഘത്തെ നിയോഗിച്ചത്.

ലഖ്‌നൗ റേഞ്ച് ഐ.ജി. കിരൺ എസ്. അന്വേഷണസംഘത്തിന് നേതൃത്വം നൽകും. അയോധ്യ ഡി.ഐ.ജി. സോമൻ വർമയും അയോധ്യ എസ്.എസ്.പി. ഡോ. ഗൗരവ് ഗ്രോവറും സംഘത്തിലെ മറ്റ് അംഗങ്ങളാണ്.

മുൻപ് നിയോഗിച്ച എസ്.ഐ.ടി. കേസിലെ പ്രാഥമിക തെളിവെടുപ്പും മറ്റ് അന്വേഷണ നടപടികളും പൂർത്തിയാക്കിയിരുന്നു. ഇതിനിടെയാണ് അന്വേഷണസംഘം പുനഃസംഘടിപ്പിക്കാൻ സുപ്രീം കോടതി നിർദേശിച്ചത്. അന്വേഷണത്തിന്റെ പുരോഗതി റിപ്പോർട്ട് ഈ മാസം 27-ന് സുപ്രീം കോടതിയിൽ സമർപ്പിക്കുമെന്നാണ് വിവരം.

നേരത്തെ ലഖ്‌നൗ ഡിവിഷണൽ കമ്മീഷണർ വിജയ് വിശ്വാസ് പന്തിന്റെ നേതൃത്വത്തിലായിരുന്നു അന്വേഷണം നടന്നിരുന്നത്. എന്നാൽ അന്വേഷണം മുതിർന്ന ട്രസ്റ്റ് അംഗങ്ങളിലേക്ക് എത്താതിരിക്കാൻ എസ്.ഐ.ടി. ഇടപെട്ടെന്ന ആരോപണം പ്രതിപക്ഷം ഉയർത്തിയിരുന്നു. ഈ സാഹചര്യത്തിലാണ് അന്വേഷണം കൂടുതൽ വിശ്വാസ്യതയോടെ മുന്നോട്ടുകൊണ്ടുപോകാൻ പുതിയ അന്വേഷണസംഘത്തെ സർക്കാർ നിയോഗിച്ചത്.