മോസ്കോ: പരിശീലനപ്പറക്കലിനിടെ റഷ്യൻ വ്യോമസേനയുടെ തന്ത്രപ്രധാന ബോംബർ വിമാനം തകർന്നുവീണ് ആറ് സൈനികർ കൊല്ലപ്പെട്ടു. റഷ്യയുടെ കിഴക്കൻ മേഖലയിലെ അമൂർ പ്രദേശത്താണ് അപകടമുണ്ടായത്.
റഷ്യൻ പ്രതിരോധ മന്ത്രാലയത്തിന്റെ വിവരമനുസരിച്ച്, പരിശീലന ദൗത്യത്തിന്റെ ഭാഗമായി പറന്നുയരുന്നതിനിടെയാണ് ടിയു-95 ബോംബർ വിമാനത്തിന് എൻജിൻ തകരാറുണ്ടായത്. തുടർന്ന് വിമാനം തകർന്നുവീഴുകയായിരുന്നു. വിമാനത്തിലുണ്ടായിരുന്ന ആറ് സൈനികരും മരിച്ചതായി പ്രതിരോധ മന്ത്രാലയം അറിയിച്ചു. ഒരാൾ അപകടത്തിൽ നിന്ന് രക്ഷപ്പെട്ടു. പരിക്കേറ്റ ഇയാളെ ഉടൻ ആശുപത്രിയിൽ പ്രവേശിപ്പിച്ചു.
അപകടസമയത്ത് വിമാനത്തിൽ ആയുധങ്ങളോ സ്ഫോടക വസ്തുക്കളോ ഉണ്ടായിരുന്നില്ലെന്നും റഷ്യൻ പ്രതിരോധ മന്ത്രാലയം വ്യക്തമാക്കി. അപകടത്തിന്റെ സാങ്കേതിക കാരണം കണ്ടെത്താൻ അന്വേഷണം ആരംഭിച്ചിട്ടുണ്ട്.
ശീതയുദ്ധ കാലം മുതൽ റഷ്യൻ വ്യോമസേനയിലെ പ്രധാന തന്ത്രപ്രധാന ബോംബറാണ് ടിയു-95. നാല് ടർബോപ്രോപ്പ് എൻജിനുകളുള്ള ഈ വിമാനത്തിന് ആണവായുധങ്ങൾ വഹിക്കാനുള്ള ശേഷിയുണ്ട്. യുക്രെയ്നിലെ യുദ്ധത്തിൽ ക്രൂയിസ് മിസൈലുകൾ വിക്ഷേപിക്കാനും റഷ്യ ടിയു-95 വിമാനങ്ങൾ ഉപയോഗിച്ചിട്ടുണ്ട്.
2025 ജൂണിൽ യുക്രെയ്ൻ നടത്തിയ ‘സ്പൈഡർവെബ്’ ഓപ്പറേഷനിൽ ഡ്രോണുകൾ ഉപയോഗിച്ച് റഷ്യൻ വ്യോമസേനയുടെ നിരവധി ടിയു-95 വിമാനങ്ങൾ തകർക്കുകയും കേടുപാടുകൾ വരുത്തുകയും ചെയ്തിരുന്നു.
