വാഷിങ്ടൺ: ഇന്ത്യ–യുഎസ് വ്യാപാരക്കരാറിൽ അന്തിമ തീരുമാനമുണ്ടായതിനെ തുടർന്ന് വിദേശകാര്യ മന്ത്രി എസ്. ജയശങ്കറും യുഎസ് സ്റ്റേറ്റ് സെക്രട്ടറി മാർക്കോ റൂബിയോയും കൂടിക്കാഴ്ച നടത്തി. നിർണായക ധാതുക്കളുടെ പര്യവേക്ഷണം, ഖനനം, സംസ്കരണം തുടങ്ങിയ മേഖലകളിൽ ഉഭയകക്ഷി സഹകരണം ശക്തിപ്പെടുത്തുന്നതുമായി ബന്ധപ്പെട്ട വിഷയങ്ങൾ ഇരുനേതാക്കളും ചർച്ച ചെയ്തു.
വിദേശകാര്യമന്ത്രിയുടെ യുഎസ് സന്ദർശനത്തിനിടെയായിരുന്നു കൂടിക്കാഴ്ച. വ്യാപാരം, ഊർജം, ആണവശക്തി, പ്രതിരോധം, അപൂർവ ധാതുക്കൾ, സാങ്കേതികവിദ്യാ കൈമാറ്റം എന്നിവ ഉൾപ്പെടെ ഇന്ത്യ–യുഎസ് തന്ത്രപരമായ പങ്കാളിത്തത്തിന്റെ വിവിധ വശങ്ങൾ ചർച്ചയായതായി ജയശങ്കർ അറിയിച്ചു. വിവിധ സംവിധാനങ്ങളുമായി ബന്ധപ്പെട്ട യോഗങ്ങൾ കഴിയുന്നത്ര വേഗത്തിൽ സംഘടിപ്പിക്കാൻ ഇരുവരും ധാരണയിലെത്തിയതായും അദ്ദേഹം എക്സ് (ട്വിറ്റർ) പോസ്റ്റിലൂടെ വ്യക്തമാക്കി.
