തിരുവനന്തപുരം: ശബരിമലയിൽ കണ്ഠരര് രാജീവരുടെ മകൻ ബ്രഹ്മദത്തൻ തന്ത്രിയാകാൻ യോഗ്യനാണെന്ന് ദേവസ്വം ബോർഡ് നിയോഗിച്ച വിദഗ്ധസമിതി വിലയിരുത്തി. അക്കീരമൺ കാളിദാസ ഭട്ടതിരിപ്പാട് ഉൾപ്പെട്ട സമിതിയാണ് ബ്രഹ്മദത്തന്റെ താന്ത്രിക പരിജ്ഞാനം പരിശോധിച്ചത്. താന്ത്രിക വിദ്യയിൽ ബ്രഹ്മദത്തന് പ്രാവീണ്യമുണ്ടെന്നും സമിതി വ്യക്തമാക്കി.
ബ്രഹ്മദത്തൻ തന്ത്ര വിദ്യാപീഠത്തിൽ പഠനം നടത്തിയിട്ടുണ്ടെന്നും പിതാവിനൊപ്പം ശബരിമലയിൽ സഹായിയായി പ്രവർത്തിച്ച പരിചയമുണ്ടെന്നും സമിതി ദേവസ്വം ബോർഡ് പ്രസിഡന്റിനെ അറിയിച്ചു. ബ്രഹ്മദത്തനെ നേരിൽ കണ്ട ശേഷമുള്ള അന്തിമ റിപ്പോർട്ട് സമിതി ഇന്ന് തന്നെ ബോർഡിന് സമർപ്പിക്കും. നാളെ ചേരുന്ന ദേവസ്വം ബോർഡ് യോഗത്തിലാണ് ഇക്കാര്യത്തിൽ അന്തിമ തീരുമാനം ഉണ്ടാകുക.
