പുതിയ സ്മാർട്ട്‌ഫോൺ സ്വന്തമാക്കാൻ ആഗ്രഹിക്കുന്നവർക്ക് നിരാശ നൽകിക്കൊണ്ട് വിപണിയിൽ മൊബൈൽ ഫോണുകളുടെ വില കുത്തനെ വർധിക്കുന്നു. ഏപ്രിൽ അവസാനത്തോടെ രാജ്യത്തെ പ്രമുഖ ബ്രാൻഡുകളെല്ലാം തങ്ങളുടെ ഹാൻഡ്‌സെറ്റുകൾക്ക് വലിയ തോതിൽ വില വർധിപ്പിച്ചതായാണ് പുറത്തുവരുന്ന റിപ്പോർട്ടുകൾ. ആഗോളതലത്തിൽ നേരിടുന്ന സെമി കണ്ടക്ടർ ചിപ്പുകളുടെ ദൗർലഭ്യവും വിദേശ നാണയ വിനിമയ നിരക്കിലുണ്ടാകുന്ന വലിയ വ്യതിയാനങ്ങളുമാണ് സാധാരണക്കാരന്റെ പോക്കറ്റ് ചോർത്തുന്ന ഈ പെട്ടെന്നുള്ള വിലക്കയറ്റത്തിന് പിന്നിലെ പ്രധാന കാരണങ്ങളായി വിപണി വിദഗ്ധർ ചൂണ്ടിക്കാണിക്കുന്നത്.

​ഓൾ ഇന്ത്യ മൊബൈൽ റീട്ടെയിലേഴ്സ് അസോസിയേഷൻ പുറത്തുവിട്ട പുതിയ കണക്കുകൾ പ്രകാരം പ്രമുഖ കമ്പനികളെല്ലാം തങ്ങളുടെ ഫോണുകൾക്ക് ഗണ്യമായ വില വർധനവ് വരുത്തിയിട്ടുണ്ട്. ഈ പട്ടികയിൽ മുൻപന്തിയിലുള്ള സാംസങ് മോഡലുകൾക്ക് മൂന്ന് ശതമാനം മുതൽ 22 ശതമാനം വരെയാണ് വില വർധിച്ചത്. നിലവിലെ സാഹചര്യത്തിൽ വരും മാസങ്ങളിലും വിപണിയിൽ ഈ ട്രെൻഡ് തുടരാനാണ് സാധ്യതയെന്നും, ഇത് പുതിയ ഫോണുകൾ വാങ്ങാൻ കാത്തിരിക്കുന്ന ഉപഭോക്താക്കൾക്ക് വലിയ സാമ്പത്തിക ഭാരം സൃഷ്ടിക്കുമെന്നും ഉറപ്പായിക്കഴിഞ്ഞു.