കോഴിക്കോട്: പെരുവണ്ണാമുഴിയില് പടക്കം പൊട്ടിച്ച് ഓടിക്കുന്നതിനിടെ കമ്പി തുളഞ്ഞു കയറി കാട്ടാന ചരിഞ്ഞു. ജനവാസ മേഖലയില് ഇറങ്ങിയ കാട്ടാനക്കൂട്ടത്തെ തുരത്തുന്നതിനിടെയാണ് സംഭവം. വീടിന് മുന്നിലെത്തിയ ആന വീടിനോട് ചേര്ന്നുള്ള കാര് ഷെഡ് തകര്ക്കുന്നതിനിടെ ഷെഡിന്റെ ഇരുമ്പ് തൂണ് ആനയുടെ ദേഹത്ത് തുളഞ്ഞുകയറുകയായിരുന്നു. കമ്പി തുളഞ്ഞു കയറിയ ആന കുറച്ചുദൂരം പോയ ശേഷം കുഴഞ്ഞുവീഴുകയായിരുന്നു.
പെരുവണ്ണാമുഴി പയ്യാനിക്കോട്ടയില് രാത്രി രണ്ടുമണിയോടെയാണ് സംഭവം. പ്രദേശത്ത് കാട്ടാനക്കൂട്ടം ഇറങ്ങിയ വിവരം നാട്ടുകാര് വനംവകുപ്പ് ഉദ്യോഗസ്ഥരെ അറിയിച്ചു. സ്ഥലത്തെത്തിയ ഉദ്യോഗസ്ഥര് കാട്ടാനക്കൂട്ടത്തെ പടക്കം പൊട്ടിച്ച് തുരത്തുന്നതിനിടെയാണ് സംഭവം. അക്രമാസക്തനായ ആന വനപാലകര്ക്ക് നേരേയും പാഞ്ഞടുത്തിരുന്നു.
