കൊൽക്കത്ത: തൃണമൂൽ കോൺഗ്രസിന്റെ നിലവിലെ ദേശീയ ആസ്ഥാനം പ്രവർത്തിക്കുന്ന കെട്ടിടം ഒഴിപ്പിക്കണമെന്ന് ആവശ്യപ്പെട്ട് കെട്ടിട ഉടമ പോലീസിനെ സമീപിച്ചു. പാർട്ടിയുമായുള്ള വാടക കരാറിന്റെ കാലാവധി 2025-ൽ അവസാനിച്ചുവെന്ന് കെട്ടിട ഉടമ മോണ്ടു സാഹ അറിയിച്ചു.
2022-ലാണ് തൃണമൂൽ കോൺഗ്രസ് ഈ കെട്ടിടം വാടകയ്ക്ക് എടുത്തത്. അതിന് മുമ്പ് ഇത് കൊൽക്കത്തയിലെ ഒരു പ്രമുഖ ഹോട്ടലായിരുന്നു. 2024-ലെ ലോക്സഭാ തിരഞ്ഞെടുപ്പിന്റെയും 2026-ലെ നിയമസഭാ തിരഞ്ഞെടുപ്പിന്റെയും പ്രവർത്തനങ്ങൾ ഉൾപ്പെടെ പാർട്ടിയുടെ പ്രധാന പരിപാടികൾ ഈ കെട്ടിടത്തിൽ നിന്നാണ് നടന്നത്.
തിരഞ്ഞെടുപ്പിന് പിന്നാലെ പാർട്ടിയിൽ നിരവധി രാഷ്ട്രീയ പ്രതിസന്ധികൾ ഉയർന്ന സാഹചര്യത്തിലാണ് കെട്ടിടം ഒഴിയണമെന്ന ആവശ്യം ശക്തമായത്. എംഎൽഎമാരിൽ പലരും വിമതസഖ്യത്തിലേക്ക് മാറിയതും പാർട്ടിക്ക് ആശങ്ക സൃഷ്ടിച്ചിട്ടുണ്ട്.
അതേസമയം, 2022-ന് മുമ്പ് പാർട്ടി ആസ്ഥാനം പ്രവർത്തിച്ചിരുന്ന ‘തൃണമൂൽ ഭവൻ’ കെട്ടിടവും ഒഴിയണമെന്ന് ആവശ്യപ്പെട്ട് പശ്ചിമ ബംഗാൾ എംഎൽഎ രംഗത്തെത്തി. തന്റെ കുടുംബത്തിന്റെ ഉടമസ്ഥതയിലുള്ള കെട്ടിടമാണിതെന്നും മമത ബാനർജിയുടെ നേതൃത്വത്തിലുള്ള പാർട്ടി അത് ഒഴിയണമെന്നും അദ്ദേഹം ആവശ്യപ്പെട്ടു. പാർട്ടിയുടെ രണ്ട് പ്രധാന ആസ്ഥാനങ്ങളുമായി ബന്ധപ്പെട്ട ഈ പുതിയ വിവാദം പശ്ചിമ ബംഗാൾ രാഷ്ട്രീയത്തിൽ ചർച്ചയാകുകയാണ്.
