കോഴിക്കോട്: സംസ്ഥാനത്ത് വീണ്ടും ഷിഗെല്ല രോഗബാധ സ്ഥിരീകരിച്ചു. കോഴിക്കോട് പയ്യോളി സ്വദേശിയായ 9 വയസുകാരനാണ് രോഗം സ്ഥിരീകരിച്ചത്. തുറയൂർ പഞ്ചായത്തിലെ 13-ാം വാർഡിലാണ് രോഗബാധ റിപ്പോർട്ട് ചെയ്തത്.

ഇതിന് മുൻപ് തൃശ്ശൂർ വടക്കാഞ്ചേരി മംഗലത്ത് രണ്ട് കുട്ടികൾക്ക് ഷിഗെല്ല സ്ഥിരീകരിച്ചിരുന്നു. 4 വയസുള്ള പെൺകുട്ടിക്കും 7 വയസുള്ള ആൺകുട്ടിക്കുമാണ് രോഗം ബാധിച്ചത്. ഇവർ തൃശ്ശൂർ മെഡിക്കൽ കോളജ് ആശുപത്രിയിൽ നിരീക്ഷണത്തിലാണ്.

അതേസമയം, സംസ്ഥാനത്ത് പകർച്ചപ്പനികൾ ദിനംപ്രതി വർധിക്കുന്നതായി ആരോഗ്യവകുപ്പ് അറിയിച്ചു. കഴിഞ്ഞ 13 ദിവസത്തിനിടെ 41 പേർക്ക് ജീവൻ നഷ്ടമായതായി റിപ്പോർട്ടുണ്ട്. ഇൻഫ്ലുവൻസ ബാധിച്ച് 9 പേരും, എലിപ്പനി ബാധിച്ച് 8 പേരും, ഡെങ്കിപ്പനി ബാധിച്ച് 5 പേരും മരിച്ചു. ഷിഗെല്ല രോഗബാധ കൂടി സ്ഥിരീകരിച്ചതോടെ ആരോഗ്യവകുപ്പ് മുൻകരുതൽ നടപടികൾ ശക്തമാക്കി. ഇടവിട്ടുള്ള മഴ രോഗവ്യാപനത്തിന് കാരണമാകുന്നുവെന്നാണ് ആരോഗ്യവകുപ്പിന്റെ വിലയിരുത്തൽ.