പാലക്കാട്: സ്കൂളിൽ സമയത്ത് പാഠപുസ്തകങ്ങൾ ലഭിച്ചില്ലെന്ന ആറാം ക്ലാസ് വിദ്യാർഥിയുടെ പരാതിയിൽ അധ്യാപികയ്ക്കെതിരെ നടപടി. ഈസ്റ്റ് ഒറ്റപ്പാലം ജി.എച്ച്.എസ്.യിലെ അധ്യാപിക പി.എ. ബിന്ദുമോളെയാണ് ആനക്കര ജി.എച്ച്.എസിലേക്ക് സ്ഥലംമാറ്റിയത്.
ഭാഷാപാഠപുസ്തകങ്ങൾ ലഭിച്ചില്ലെന്ന് വിദ്യാർഥി ഓൺലൈനായി വിദ്യാഭ്യാസ മന്ത്രിക്ക് പരാതി നൽകിയിരുന്നു. തുടർന്ന് മന്ത്രിയുടെ ഓഫീസ് വിദ്യാഭ്യാസ ഉപഡയറക്ടറോട് അന്വേഷണം നടത്താൻ നിർദേശിച്ചു. അന്വേഷണത്തിനൊടുവിലാണ് സ്ഥലംമാറ്റ ഉത്തരവ് പുറപ്പെടുവിച്ചത്. ജില്ലാ വിദ്യാഭ്യാസ ഉപഡയറക്ടർ ടി.എം. സലീന ബീവിയാണ് ഉത്തരവിറക്കിയത്. ഈ അധ്യയനവർഷത്തിൽ 5, 6, 7 ക്ലാസുകളിലെ ഭാഷാപുസ്തകങ്ങളുടെ വിതരണം വൈകിയതായും കണ്ടെത്തി.
സൊസൈറ്റി സെക്രട്ടറിയായിരുന്ന അധ്യാപിക സമയബന്ധിതമായി നടപടികൾ പൂർത്തിയാക്കാത്തതാണ് വീഴ്ചയ്ക്ക് കാരണമെന്ന് റിപ്പോർട്ടിൽ പറയുന്നു. ഒരു വർഷത്തേക്ക് ഓൺലൈൻ സ്ഥലംമാറ്റത്തിന് അർഹതയുണ്ടാകില്ലെന്ന വ്യവസ്ഥയും ഉത്തരവിൽ ഉൾപ്പെടുത്തിയിട്ടുണ്ട്.
